中軟國際（354）由上年11月見計起，累積升得36%，跑輸同行九條街，價殘要收集。中軟主打祖國IT業務，近磅股有浪潮國際（596）。後邊浪潮，由11月見底到家陣，累積升幅1.2倍，中軟同期累升36%，跑輸九條街。
中軟最新NAV0.94元，現價（0.53元）P/B得0.56倍，浪潮經過呢輪急升，最新P/B講緊4倍。中軟殘到痹。同浪潮一樣，中軟股東當中，包括美國微軟（Microsoft）呢家超級大孖沙。集團亦羅致咗包括祖國政府單位及大型國企實力大客戶，尤其家陣金融海嘯吹到嘭嘭聲，中軟亦唔憂冇生意。
中軟往績PE得3.4倍，好保守計數，08年度純利只係增長10%到1.27億銀人仔，PE都仍然係keep住3字頭單位數。以中軟1倍P/B做目標，集團現價都講緊要升77%到0.94元，P/B仲未有耐追到浪潮水位，預期PE仲係企喺6倍。
天業有point炒一轉
天業節水（840）對上星期臨尾兩個交易日，成交先行，先嚟轉短打。祖國北方旱災，A股市場呢期就狂炒「節水抗旱」板塊。港股當中，天業主打農業節水灌溉系統及相關配件製銷及安裝，有point炒。天業主打業務，一則食正阿爺環保國策，更加受惠谷內需扶農國策，中線業務前景，值得高度關注。呢轉趁交投異動，博天業升20%到0.8元，NAV折讓仲係講緊40%樓上，未有耐追到祖國類近股水位。
錢雋