戰友畢傑兄講股票，小弟就對金魚缸又愛又恨；當年科網股爆破，蝕到入晒肉。
睇過紀錄片《大國崛起》，認識到全球第一個股票交易市場就喺荷蘭，雖然論現時經濟影響力，荷蘭已大不如前，不過荷蘭波都有前冇後風格，都好受歡迎；今次就揀一場荷甲大波膽；飛燕諾上半季衰到貼地，不過歇冬後，傷兵潮已見改善，丹麥前鋒湯馬臣已復出，另一前鋒比錫斯禾爾腳風亦順，上仗打吡戰小勝鹿特丹斯巴達，今次再度主場出征，面對聯賽3連勝嘅格羅寧根，馬會主W竟然只得兩倍，擺明對「飛仔」連勝有信心，一於博今場演入球騷，取「飛仔」贏4:2呢個34倍波膽。
德甲賽事方面，班霸拜仁慕尼黑上仗不敵漢堡，未能取得歇冬後首勝，不過信呢班兵反彈力強，而且主場例食多蒙特；青蛙仔就喺另一個地盤推介拜仁贏3:1，我就認為唔止呢個數，上季都贏5:0啦，一於膽粗粗博5:1波膽，都有30倍，東尼、高路斯，呢場要生生性性呀！
波爾多受讓下盤筍
尾關就博法甲嘅波爾多作客贏馬賽2:1；波爾多今季繼續大勇，前國家隊中堅白蘭斯領軍有方外，留得住卡雲拿基及哥古夫兩大主將，對球隊亦有幫助，小弟在另一地盤已支持受讓平/半嘅波爾多，可博下盤；波膽方面，面對慌失失嘅馬賽後防，波爾多贏埋都唔奇，揀個「正常」小小嘅波爾多勝2:1波膽。
文：牽牛