有錢人之為有錢人，其中一個原因係識得理性消費，自由黨前主席田少精打細算，今年樂得以海嘯價去日本、美國滑雪度歲。佢同八方講，此行有意外收穫，就係經濟不景，美、日滑雪勝地都人影疏落，往年要排隊上山滑雪，今年卻路路暢通，佢同女兒、女婿、孫仔，上上落落滑足十幾次，滑雪滑到氣咳，真係抵到爛。
對迪士尼加價失望
田少滑雪樂而忘返，美中不足係回程時由於UA航空取消班機，佢哋要揸車去另一機場上機，佢歸心似箭，越揸越快，中途俾警員截停，指公路時速上限65公里，佢揸到85公里，超速20公里，即時罰款75美元（約585港元），個警員仲話見佢係遊客已經從輕發落，否則要罰過百美元。
點知返到香港仲激氣，田少話睇新聞知道迪士尼竟然逆市加價，真係令佢好失望，唔明點解要喺呢個時勢下加價趕客，佢表明個人唔支持加價，希望迪士尼睇清楚盤數，如果加價後入場人數減少，應該主動下調票價，否則對香港人唔住。