喺〈蘋果開倉〉貼咗熱門穩膽雷丁，但嚟到呢個地盤要切合番英國持續落雪嚴寒嘅天氣，揀吓冷品應吓景，先博奧咸打敗英甲「1哥」李斯特城；另外搵維拉同海倫芬波膽過關，希望幫到大家卜張靚枱下個禮拜同情人食餐好啲啦！
我對英甲個別強隊算有認識，今日英甲夜場戲碼李斯特城迎奧咸一役，值得研究吓；前者雖不如英超曼聯及荷甲阿爾克馬爾兩大榜首隊長勝不失球，但今屆亦不乏大炒對手鏡頭；目前以10分拋離次席米爾頓凱恩斯，失分空間極多，陣中較為人認識有阿仙奴借將基拔、利物浦中堅賀比斯、短暫踢過英超的箭頭史堤芬侯活及老將迪哥夫。
不過對手、排第6的奧咸論人腳絕不遜色，最重要由侯城借得老牌前鋒韋達斯，睇積分表，奧咸已較第5位的米禾爾多踢3場及少1分，照計要頂住個第6位在季後踢升班附加賽，失分空間越嚟越細，李城防線又唔係穩，不如博雙方鬥攻，狠啲開個4.5倍客W。
中波膽過關慶情人節
另外鍾意維拉作客贏到布力般，因為周中半力在盃仔贏唐卡士打，今次「夫添」對周中踢足120分鐘，淘汰新特蘭嘅布力般，維拉作客反有較佳賠率；至於周中輸波嘅海倫芬，今晚返主場迎NAC可以有完全不同演出，今期荷甲興隔紗呀！呢條飛80蚊，即大X樂兩個晚餐嘅價錢，過到關起碼可以升級，下周去中價酒店食個情人節晚餐，輸了咪返屋企撐枱腳咯。
文：蘋果波神