哼一哼「春風它吻上我的臉，告訴我現在是春天。」香港政壇近日氣氛好似特別和諧，立法會噚日宴請特首同官員團拜兼開年，主席曾鈺成同民主黨涂謹申係焦點，因為佢哋近日搵到第二春，阿曾表現風騷，被問到幾時請飲，聲言「隨時請飲都得。」
阿曾阿涂話要拖延婚期
大家起哄追問佢幾時係大喜日子，佢當眾發表冧女宣言，話如果係有情人，年年都係好年，日日都係情人節，使乜擇日子？不過曾鈺成隨即兜番，話要響應煲呔呼籲，集中精力搞好經濟，其他事情一律押後，所以佢嘅婚事都要好似政改諮詢咁要拖延，至於係咪等到第四季就拉埋天窗，佢笑而不答。
同樣有新女友嘅阿涂，噚日一到場即刻去恭喜曾主席，唔知有冇分享冧女心得？有人問阿涂幾時再婚，佢話都要響應煲呔呼籲，現時全力搞經濟。力倡政改可以慢慢傾嘅政制及內地事務局局長林D9，講到辦喜事卻話事不宜遲，據講林D9席間指今年農曆五月係閏月，最好結婚擺酒，兩大黨一齊搞婚宴更佳。
認為經濟優先嘅煲呔，噚日都撥行大葵扇，反對阿曾、阿涂押後婚期，席間更發表結婚經濟論，話結婚係好事，可以刺激經濟㖭。
經機會應該諗諗搞大佢
婚禮產業係以百億元計大生意，新人結婚擺酒閒閒哋使一百幾十萬：擺酒幫助飲食業，租花車有利運輸業，搵律師證婚益到專業人士，度蜜月要幫襯旅行社，置業就推動樓市，總之越多人結婚，對經濟越好。經機會下星期開會，煲呔要「撐企業、保就業」，應該加多句「快結婚」，除咗做好份工，仲要做好老公。
噚日午宴，高官、議員仲玩咗名為「群策群力」嘅有口難言遊戲，「好打得」嘅林鄭局長原來仲好玩得，唔使對手譚偉豪做動作，單憑主持人提示已估中答案，兩分鐘內答啱八條奪冠。醫學界議員梁家騮轉數快，要對手估港鐵站名「佐敦」時，做出打籃球動作，同樣轉數快嘅曾鈺成讚佢有創意，其他人睇到卻一頭霧水。
mailto:[email protected]
