自由黨要拉大隊到西環拜年，主席、黨員齊齊聽中聯辦主任高祀仁訓話，工聯會就唔同嘞，調番轉頭，高主任移船就磡去工聯會土瓜灣總部拜年。
高祀仁噚日帶同副主任彭清華、周俊明等去工聯會，發言時大讚工聯會係支持港府「旗幟」，愛國愛港「先鋒」，維護工人「鐵心骨」，維護香港穩定繁榮「後盾」，講到好似冇咗工聯會會天下大亂咁。
工聯會會長鄭耀棠透露，去年有20,000個新會員，工聯會現有逾32萬名會員，目標係明年達成35萬人，棠哥對呢個數似乎幾有信心，因為經濟差，打工仔權益受威脅，會刺激工人加入工會。工聯會亦會大規模探訪基層工人，全方位出擊收𡃁。