好耐以前已經想長測Subaru架R2，揸到返公司，一堆同事評頭品足，大部份人諸多挑剔，嫌三嫌四；但在我眼中，卻睇到好多連中價車都冇嘅設備，最多人不滿嘅660c.c.引擎，都通過我哋800+磅FullLoading測試，新車只賣幾萬蚊，仲要日系名牌出品，睇車揀車，從來都係「半杯水」問題。
記者：徐影龍
攝影：陳陶鈞
Model：Fion
800磅照上斜
R2賣八萬幾蚊，一聽個價幾乎肯定架車好Dry，只好專心試真個660c.c.引擎仔。一個人揸時，車身負重有限，表現尚算得心應手，除慢車後起步會嚴重扯高轉數外（閒閒地5、6千轉），全程斯斯文文掂住油門，已經差不多超速，OK吖，最多溫柔啲揸囉，完全心急唔到，女仔絕對啱揸啱坐。
好喇，跟手班嚟兩位大隻佬，連埋司機強哥同Model，4個人一口氣塞晒入R2度，據當事人報嘅磅數，加埋已超過800磅，車身即時壓低2"有多，以為奀挑鬼命嘅R2頂唔順行唔郁，出發後先知太睇小R2；起步同一個人揸時居然差不多，唔會話踩極唔行，當然，一切仍然以斯文慢揸為主。上大斜路，R2略有氣咳，引擎嘈得好厲害，當下拍番落L波度，雖然一樣轉數高揚，但已可徐徐加速。由於負重太多，落斜時衝得幾行，要密密踩Brake。輪到試彎，本來R2車身高不利攻彎，但坐滿人又唔同講法，穩定性好高，最值得欣賞一點，係轉彎時完全冇磨沙板，證明再裝多啲嘢都仲得，女士們啱聽喇啩。
日系車空間夠
CuteCar從來不乏捧場客，永遠有女仔買佢番嚟，改頭換面兼擺滿公仔。早幾年掃把佬推出帶有跑味既R1時，全新車只賣七萬蚊，喺當年市道暢旺下都幾震撼。06年推出R2，唔玩辣跑轉玩可愛，今次唔係試揸幾日，都Feel唔到日系嗰種久違嘅易用性，由窗戶、校電鏡到冷氣，直覺式使用簡單易明，好有親切感。車身體積跟薯嘜forfour差不多，但內櫳偷盡每一個空間，闊落程度好有驚喜，肥同事坐前排，稍稍拉後座椅，已經夠位畀佢un身un勢，一般CuteCar點做得到？
R2喺08年搞過小變臉，輪圈尺寸不變，但改得較有立體感，內櫳由米白色改為全黑，絲絨椅都係深色襟污糟啲，最大變化就係中控台，舊款個置物「窿」，已改成一體式設計，金屬色望落相當大方得體，大大減低R2車廂嘅膠感。若要認真彈R2，我會嫌佢居然不設任何時鐘，咁小事都要車主自己買，抵鬧。
以價論貨，R2唔貴，就算日圓狂升，廠方都搞番個減價Promote，將原本售價$94,500減至$87,150，近乎九折，抵唔抵見仁見智，但一定唔係貴。
規格表：
引擎：658c.c.直四DOHC
馬力：54ps/6,400rpm
扭力：6.4kg-m/4,400rpm
傳動：智能無段波箱，前驅
查詢：Subaru灣仔陳列室（25112727）
