東華三院噚日牛年團拜，主席馬清鏗同八方講，雖然金融海嘯令富豪身家暴減，不過善長都係有口齒之人，講咗就算數，所以善款數字暫未受影響，「啲人之前應承咗捐嘅，都照捐，冇縮沙，而且啲屋邨仲捐多咗錢，meet到target。」
佢話東華今年有多個新計劃，包括廣華醫院重建、社區書院升格大學，又會辦食物銀行同助養孤兒嘅「夢成真」計劃等。獲聘做東院執行總監嘅前高官羅范噚日冇現身，相信係因為當局仲未批准佢做新工作，所以不便露面。馬清鏗話希望羅范一、兩個月內可以上任，「羅太好能幹、好熱心，係不可多得嘅人才，希望喺我3月底卸任前，佢可以上任啦。」