新年後收到讀者來郵，一位讀者K不滿意潘宗光校長，話左丁山應該知道理工大學清潔工人嘅薪酬，未知道之前，唔好稱讚潘校長。左丁山話潘校長感恩，係講佢在新書內多謝母校聖保羅男女之老師校長嘅栽培，飲水思源啫，我冇讚錯佢吖？至於潘校長治理理工大學嘅清潔工人薪酬，左丁山全無認知，亦認為與潘校長感恩之事扯不上關係。相信讀者K讀書不少（從佢之英文電郵十分通順，勝於一般水平可以看得出），站在清潔工人一邊，有佢嘅理由。扯開啲講，不少本港大型機構/企業將日常清潔保安工作外判，承包公司以市場水平聘用工人，薪酬肯定低於政府機關嘅薪酬編制，若因此而大罵該機構之主事人冇良心，左丁山不敢苟同。記得上一次金融風暴之時，社會一般薪酬急降，中文大學當時聘用清潔工人，以公營機構薪酬編制計算月薪，竟然畀報紙大罵過份慷慨，浪費公帑，但就唔讚中大有僱主良心，所以呢啲嘢，任傳媒講嘅啫；畀得多，罵浪費；畀得少，罵無良，何謂適中，天曉得。
讀者曾睇完陳居士一文，要求提供陳居士聯絡方法，想搵陳居士算一算八字。呢樣嘢有保留，因為左丁山唔想畀人誤會在此為朋友宣傳搵生意也。讀者C來郵話自己生肖屬羊，犯太歲，應如何化解？今年牛年，牛者丑也，羊者未也，剛好丑未相冲。今年犯太歲者，一般帶一塊銀製鼠牌，拜車公之時，見到周生生在廟內有攤位，售賣犯太歲生肖之飾物，讀者C或者可以去沙田車公廟睇一睇。
因讀者K之言，因而引伸到另一個問題，就係不時睇到一啲評論，往往質疑不同意見者嘅動機與利益，而唔係從反方嘅證點、論據、論證嚟反駁，辯論之時，如果反方理由充份，何必理會佢嘅動機吖，人哋啱就係啱嘅啦，譬如三、四年前西九大辯論之時，高志森力主加快建設西九，反對西九一方就有人質疑高志森之動機與利益，對高志森之意見略過不提。高志森擺明車馬，當然係擁護演藝人士嘅利益啦，唔通因為咁，佢提出之意見就畀打落冷宮，當佢冇到乎？香港好多人鍾意對人不對事，睇事物不從理性邏輯討論，而係往往因人廢言，以動機、陰謀、利益為理由，抹去別人意見，可嘆也。