自從農曆新年過後，敏妮聽到好多朋友問，家陣好唔好買樓？敏妮第一個反應係，「海嘯噃！」雖然話投資要用逆向思維，但好多時亦要諗吓實際情況，雖然銀行「口硬」話負資產唔會大幅惡化，樓市唔會好似98同03年咁悲情，但事實上，負資產宗數有上升，失業率大家都睇得好悲觀。
對於置業人士嚟講，買樓除咗要睇市況，最好平買，千祈咪高追，更加重要係睇實際經濟情況，消極嘅方法係，盤算吓自己嘅供款能力會唔會有變；積極嚟睇，經濟進一步轉壞，樓價自然會再跌，家陣咁嘅情況大可以睇定啲先決定。
經濟轉壞樓價難升
敏妮嘅鄰居，舊年因為家中多咗一個成員，所以要搵過層樓，由於當時樓市啱啱向下，佢問敏妮意見，好唔好賣咗佢，再買過另一個大單位。當時敏妮同佢講，賣樓可以，但千祈咪未賣出層樓就孭過第二層樓債，可以考慮先租個大啲嘅單位，將自己嗰層放售，賣唔出就先放租，始終敏妮家住嘅尖沙嘴區，租金一向都企得幾硬。
呢位鄰居見當時樓價仲企得幾穩，所以開出一個敏妮媽咪聽到都耍手擰頭嘅價放售自己層樓，另一方面，佢太太見到黃埔某個單位非常鍾意，所以未待自己層樓放出就買咗個單位，好彩鄰居做核數師，金融海嘯反而令佢仲吃香，孭得起兩層樓債，所以舊居企硬唔減價。
減價兩成賣樓減債
不過，屋企多咗個細路要養，太太冇出嚟做嘢，仲要孭兩層樓，長期都幾難支撐。呢幾日敏妮見隔籬屋有裝修師傅度尺，聽消息靈通嘅看更叔叔講，層樓終於賣出，樓價比起初叫價降咗兩成。敏妮都戥佢高興，唔使再孭住兩層樓，但隔籬屋裝修，相信敏妮有排冇覺瞓。
溫敏妮
http://wanmanli.com/blogs/