金融海嘯捲走富豪身家，舊年打入《福布斯》首40名香港富豪榜嘅壹傳媒主席肥佬黎都不能倖免。佢舊年以12億美元（約93.6億港元）身家排行第32位，今年身家蒸發四成半，得番6.6億美元（約51.5億港元），排名跌一位至第33位。
肥佬黎接受最新一期《福布斯》訪問時話，受金融海嘯影響，零售業不景，報刊廣告收入大減，估計今年係傳媒業艱辛嘅一年。
繼續加強報刊圖像化
雖然前景不妙，又話高估咗互聯網商機，但肥佬黎對傳媒業未來發展仍充滿信心。雖然美國有報紙破產，但只要報紙變得更圖像化同高質素，舊媒體仍有可為。肥佬黎透露旗下報刊會加強圖像化，因為讀者更易理解內容。
肥佬黎又承認，雖然早前收購台灣中時集團失敗，但有信心一至兩年內可成立以新聞為主嘅電視台，佢認為台灣嘅電視台節目太地方性，所以會製作創新節目，並收購電視頻道播放。至於幾時進軍內地市場，肥佬黎話當內地經濟蓬勃增長，當權者更開明更開放，就係壹傳媒北上之時。