立法會主席曾鈺成被指係「疑似中共地下黨員」，原來佢仲有段地下情。不過紙包唔住火，呢段鮮為人知嘅戀情近日終於曝光，曾鈺成噚日承認有第二春，至於會否再婚，佢話有呢個可能性，一切順其自然。
曾鈺成親口認戀情
左派圈子流傳阿曾有新歡消息一段時間，早前有人目睹佢同女友喺北角買餸玩煮飯仔，不過阿曾一直搞地下情，有人問及，佢就好似被問係咪中共黨員咁，既不承認也不否認。近日有同佢稔熟人士爆響口，指阿曾快將再婚，噚日出席中華總商會團拜酒會時，佢終於首次公開話自己正蜜運中。
雖則共產黨員係用特殊材料製成，但談情說愛時與常人無異，地下黨員小心翼翼保護地下情，噚日多次叫記者「唔好搞禍我」，堅拒多談戀情，點樣過情人節更加三緘其口。阿曾以前係培僑中學校長，現任校監，佢透露新女友係培僑舊同事，相識多年，幾個月前重遇撻着，農曆年假期時更一齊旅行，「最近有啲比較密切嘅來往。」曾鈺成現年61歲，佢笑言同新女友兩人加埋逾百歲。
阿曾同前妻離婚兩年，90年代初佢籌組民建聯高喊「留港建港」時，卻被揭發妻子帶埋個女移民加拿大，因此被謔稱「太空成」。近年女兒同前妻都回流香港，有認識阿曾多年嘅左派人士話，想唔到一家團聚，卻挽救唔到婚姻。
黨友儲定錢做人情
政界對曾鈺成拍拖七嘴八舌，民建聯副主席葉國謙話認識阿曾女友，佢話唔驚阿曾掛住拍拖荒廢政事。另一民建聯議員黃定光則話，對於阿曾好事近略有所聞，笑言係時候儲定錢做人情。
白鴿黨李永達曾離婚又再婚，佢話好佩服曾鈺成搞地下情工夫，「點解可以收埋咁耐㗎！」阿曾係疑似地下黨員，又精於搞地下情，相信對談地下情「五要四不」滾瓜爛熟，如果中共要喺香港設立地下情……報科，最好由佢擔任書記。佢細佬民政事務局德成局長喜見大佬有新戀情，恭喜佢「大地回春」。
mailto:[email protected]