花旗股市唔掂，好彩內地股市生猛，帶動港股向上，恒指噚日一度升超過400點，逼近13500，不過晏晝A股倒跌，港股回得好急，但低位有承接，恒指升115點收市。
其實升百零點唔算係乜好消息，反而現貨成交增加至500幾億元至係利好嘅訊號，成交細嘅升市意義唔大，如果繼續有大成交支持升勢，後市可以睇好。
江銅C輪15405：江西銅（358）昨收6.10元，升4.4巴仙，成交連續第3日顯著增加，股價升破100日線，將反覆上試7.10元，可以諗吓隻C輪15405，昨收17.6仙，有效槓桿2.1倍，正股升上7.10元，15405有機會見24仙；如果正股升上7.50元，隻輪嘅目標價睇26.8仙。正股跌穿5.60元，就沽咗隻輪止蝕。
俊樺