球員想極速消脂？投效AC米蘭啦！「萬人迷」碧咸前日代表AC米蘭友賽作客格拉斯哥流浪和2:2後，首次親口表態，話想為紅黑軍踢到收山；而AC之吸引，在於幫到佢keepfit消脂，有望令佢實踐踢2010年南非世界盃嘅美夢喎。
線條又靚又firm？
「我希望兩間球會（洛杉磯銀河、AC）傾掂數，我想喺AC踢到收山！」碧咸態度堅決：「加盟AC後我得着比預期為多，隊友撐我、教練畀我踢正選，最重要係提升到狀態。記得喺杜拜（去年底至今年初），我嘅脂肪比例係13.7%，家陣就係8.5%。」咁咪好似廣告話齋，線條又靚又firm?
平心而論，碧咸狀態轉「弗」又未必完全同AC有關。又唔見以前韋利、朗拿度加盟AC之後，即刻fit晒？不過，我求大俠都做過功課，問咗體院運動科學及醫學統籌主任蘇志雄，佢話碧咸嘅脂肪百分比，喺咁短時間內減咁多，其實未必健康；作為足球員，個百分比最好係10%，因為脂肪少係會身輕跑得快，但太少又唔能夠保護內臟，增加受傷機會……，呢點反而係我求大俠最擔心嘅。
友賽格流和2:2冇料到
講番場友賽，全英國成場波都好似搵探射燈射住碧咸咁，但佢踢嚟漫不經意，半場就收工；場波喺下半場至嚟料，比士利為格流先入波，跟住卡卡同柏圖入波反超前，但最後主隊由後衞柏巴斯扳平。
有英國傳媒話碧咸全場行住咁踢，質疑佢日後能唔能夠維持90分鐘體能。查實可能佢心知係友賽，英軍領隊卡比路又唔係座上客，所以至漫不經心。話唔定，佢已經有信心喺周末公佈嘅英軍名單中榜上有名。