作為女人仔，最怕坐上車時傳嚟陣陣迷人「香」，尤其係男人車，汗味、煙味、古龍水混成獨特異味，搵香精幫手除一除，接受得到還好，如果唔係隨時以毒攻毒暈得一陣陣，專家教落天然最好，搵啱迷人香精，車仔即刻變香車。
記者：梁美甜
攝影：梁細權
Model：Vanessa（StageModels）
以毒攻毒咪搞
據曹宏威博士解釋，市面好多香精含化學成份，所謂香精除臭或飄香只係利用甲醇令香精揮發而產生香味，覆蓋式以香味壓過臭味，根本無分解到臭味，衰啲講句即係以毒攻毒；仲有可能誘發鼻敏感病㖭。「始終香精唔係藥物，有臨床實驗同測試，無數據證明其作用同功效。」
口痕友人話：「可以提神吖嘛？」曹博士答得精采：「飲杯咖啡仲實際。」係！「用之前應該問：點解要用。除臭飄香應該用啲無害方法同物料，真係要用嘅話，可以揀價錢平、不含化學成份同溶劑，同埋個人喜好。用時噴少少，少少香已經足夠。」總括而言要用香精最好揀天然，再依個人喜好揀味道，即係好似女人香水咁，唔係人人都鍾意同一款香味。
隨便香
係，市面上除臭飄香嘅香精款式真係多到令人眼花撩亂，最重要係個人喜好，想成份天然抑或係化學合成都得，只要你鍾意又接受得了，甚至買個樽返嚟再換香油都仲得。
自然香
所謂自然香即採自天然，好似植物花草樹木、礦物如炭咁具有香氣又或者除菌功效。
人造香
時款香精大多係人為化學合成，相對於天然成份香薰而言，價錢平兼款式多。
1.活性炭同竹炭都係天然車用除臭劑。左：Carall竹炭力，$36；中及右：Carmate消臭炭產品。$39-$45（c）
2.天然成份香薰油，CarmateNaturalSpa，有白麝香及綠茶味。$45（a）
3.Picke倒後鏡吊掛香精，除咗金魚，仲有企鵝。$29（b）
4.骰香味有13種味道，以左下黑色CK香水味最受追捧。$36-$49（c）
5.閃爍潮款襯櫳至啱，前：LaxeeKings鑽石香精，三種味道，以波子汽水最特別；後：Hypersonicfragrance，香味濃。39-$45（a）
6.剛抵港Polaris香薰座，每個均鑲有12粒碎石，夠晒Bling，三種味道，推介近似椰香嘅咖啡味。$98（b）
7.SuntechAnimalColor動物系列，至啱寵物迷。$39-48（a）
8.Carmate型掛香精Galahad，同樣有CK香水味選擇。$75（b）
除臭自然法
曹博士話想除臭只須冲一冲。即係將部車全部窗關上，調校車內溫度至攝氏26至27度，以高溫熱氣焗一焗，之後至開窗冲（疾走令空氣急速流通），臭氣自然少。
白蘭香
曹博士話最可以接受係白蘭花香味，亦係普遍人都可以接受嘅味道，既然係真花，壽命實唔長，點保證持續有供應，唔通要自己種？
（a）揚威汽車用品（23855203）
（b）台日汽車用品有限公司（23924244）
（c）威一系汽車用品公司（23843876）