周慧敏（Vivian）婚後首次和老公倪震小別，前晚以「饑饉三十助養大使」身份到尼泊爾作親善探訪，不過Vivian似乎有心避開現場傳媒，臨夠鐘入閘才匆匆現身，急步受訪的她，表示不擔心老公一個人在家會感到苦悶。
新婚約一個月的周慧敏，獲邀擔任「饑饉三十助養大使」，前晚她出發往尼泊爾探訪當地小朋友及貧窮家庭，同行還有「饑饉之星」蔡卓妍（阿Sa）、張敬軒和商台DJ細蘇。
抵機場拒現身
據知探訪團乘坐近傍晚7點機，而Vivian於5點左右已到達機場，但一直沒現身，由助手幫她辦理登機手續，至6點多，身穿長外套、戴上黑超的Vivian才出現，並沒有停下來接受訪問，邊行邊說，但有fans要求影相時則停下合照。
問到Vivian會否擔心見到當地慘況會眼淺落淚，她表示不會，並謂已叮囑自己不要落淚。今次是Vivian婚後首次離港和老公倪震分開，問她會否致電回港給老公？Vivian說：「我諗山區未必收到電話，佢可能搵唔到我。」至於會否怕老公一人在家會感到苦悶？Vivian說：「唔會、唔會。」說畢便匆匆入閘。
阿嬌下月復出
阿Sa和軒仔則一早到機場準備，問阿Sa會否計劃和鍾欣桐（阿嬌）同做慈善探訪？她說：「其實唔使一定一齊，隨時都可以做。」至於Twins何時復出，阿Sa表示公司會有安排，一切交由公司宣佈，但她透露Twins下月會有工作。阿Sa透露新年曾到阿嬌家中拜年，並指她身形很弗，狀態十足。軒仔就表示除了好友洪卓立因肺積水入院外，其父也不慎弄傷腳，打算從尼泊爾返港後探望兩人。
採訪：何永寧
攝影：黃偉雄