牛：嘩！繼雷曼苦主之後，周中又出現一大班阿積士苦主！
畢：你係咪講阿積士主場對荷華高斯呢場波呀，主W只得1.09倍，竟然阿積士只迫和對手2:2，貪嗰9厘息嘅波友真係心傷。
牛：我都有份買「主勝」，其實70幾分鐘已經追番2:2，以為有啲希望反勝4:2，唉！只怪自己信錯尹巴士頓，點估到佢帶班波可以3場唔贏。
畢：好彩我哋共同心水西維爾主W中番。
牛：記得西維爾上圈次回合，又係完場前先入華倫西亞，贏2:1晉級，估唔到今場又係咁贏2:1。
畢：周六佢哋就有場塞維利亞市打吡，主場對貝迪斯，我就覺得有啲危；貝迪斯要搶分護級，近3仗都攞到4分，有番啲起色。
牛：講開打吡，周日就有北倫敦打吡，熱刺主場對阿仙奴，你又點睇？
畢：阿牛，我知你係阿仙奴躉，不過唔好意思嘞，我支持熱刺。
牛：阿仙奴有艾沙維新加盟喎！點計都高質過柏夫里約真高啦！
畢：講新兵，熱刺又點驚你，羅比堅尼、占邦達等根本就回流，可以即食即用，適應點都好過艾沙維啦；之前阿仙奴簽過另一位東歐兵希比，都搞到大半季都融唔入球隊，我唔信艾沙維可以即刻發威。
牛：雖然阿仙奴上場聯賽畀韋斯咸悶和，全因韋斯咸全場死守，今次熱刺主場，點都要攻，反而有空位畀阿仙奴打反擊。
畢：好，既然係咁，我哋就sidebet杯奶茶，睇吓邊個眼光好啲啦！