正施工興建嘅添馬艦新立法會大樓，內部設計被指似北京人民大會堂，議員睇過裝修草圖後多數唔收貨。八方聽聞有關方面好大機會從善如流，設計可能會被修訂，立法會秘書處噚日就新大樓記者室、採訪設施諮詢傳媒意見。
八方同一眾行家都認為新大樓應該盡量開放，唔好多設禁區限制記者追訪議員、官員，更加唔可以有秘密通道畀議員、官員「走後門」鬆人。另一個記者關注地方，係示威區安排，秘書處建議分別喺正門同側門設立三個示威區，同時有記者區，總之市民一定有地方向議員、官員陳情，記者亦可影到相。八方認為示威區最緊要夠大，如果市民因為示威區爆棚失去抗議機會，於理不合。