金管局前高層梁鳳儀做咗財經事務及庫務局副局長後，由於作風強悍，八方聽聞同局內政務官有唔少牙齒印；去年由旅遊事務專員過檔升做財庫局常任秘書長嘅區璟智，近日亦辣㷫同僚。有兩個辣妹坐鎮，唔使大師占算，都知財庫局牛年多是非。
做paper當考驗
區璟智新官上任，下屬預咗佢有三把火，據講有人指示下屬寫份paper，頂頭上司落order，做細嘅忙到甩轆都要做啦，仲要快快手搞掂交貨。份paper不日完成，如常咁層層上繳，較高級官員仔細覆核完，就輪到更高級嘅覆核多次，最終交到去大老細枱面，點知呢位高官睇咗一睇，冇任何評論，只係話其實唔係真係需要呢啲資料，叫大家做咁多工夫，只係想試吓各人做嘢係咪ready，狀態fit唔fit啫！
官場𠵱家係咪流行呢種最新考核工作效率制度，八方不得而知，不過AO圈子流傳呢個消息係事實，總之慘遭人老點、白費工夫班AO就谷到成肚氣。事關日常工作已經做到氣咳，新老細忽然畀啲咁嘅「考驗」大家，唔通驚大家未過勞死？