備受英皇力捧嘅洪卓立（Ken）上月18日因疲勞過度致肺積水復發，手術後情況一度危殆，𠵱家仲喺瑪麗醫院留醫。據佢經理人霍汶希（Mani）透露，因為怕Ken受感染，所以𠵱家要住喺隔離病房，由於復工無期，搞到Ken有份演出嘅台灣偶像劇《王子看見二公主》都要臨時抽起佢嘅戲份。
雖然Ken病情嚴重，但同屬英皇嘅鍾舒漫噚日出席新城活動時自爆年初一之前探過Ken，仲話佢肥肥白白兼好開心，之後佢繼續話：「不過佢好樂觀，會叫佢休息多啲，唔好咁緊張。」
台藝人頂替
洪卓立嘅媽咪噚日朝早都有到醫院探望，目前洪卓立喺心肺外科病房，由於有藝人留醫，所以門外安排咗保安人員守候。
對於喺《王》劇中擔綱第二男主角嘅Ken，有傳因卡士唔夠被飛出劇集，Mani堅決否認，仲話𠵱家未知Ken要休息幾耐，就算佢康復都只會安排輕鬆工作畀佢。Mani仲承認為咗向劇組交代，已經將約一半嘅片酬退番畀台灣劇組，加埋Ken接咗嘅工作，損失都有六位數字，Mani話：「佢媽咪話Ken疲勞過度而有事，佢太辛苦，佢媽咪仲要求Ken之後要少啲工作，多啲休息。」至於《王》劇劇組就話體諒洪卓立有病，故暫停佢嘅戲份，並另闢新角色，搵嚟台灣男藝人張勛傑代替。
