今日正月十一，正所謂十月都係拜年時，有心總唔怕遲，香港MINI派出Clubman同大家拜年，更率先掀起牛年新車減價攻勢，08新車大手筆劈價六萬幾，二十萬多啲，足以同日系鬥抵玩，呢架拉長版MINI更有自家一開二尾門特色，兩邊門細細隻仲有油壓撐住，大頭蝦人士唔怕中另類「頭彩」，好似門神咁保你出入平安、開門大吉。
記者：徐影龍
攝影：陳盛臣
Model：Wing@PureModels
唔係講笑，身邊總會聽過，更或親身體驗過，尾門失驚無神拍落嚟夾到人。唔係話傳統向上揭起嘅尾門設計有問題，而係MINIClubman實在太親切體貼，左右兩半尾門夠輕夠細隻，底下亦設有油壓管控制開閂幅度，根本無機會夾到自己，嬌小女士更毋須踮起腳，拉長個身嚟閂道揭背尾門，面對MINIClubman，就如打開衣櫃一樣咁輕鬆。幾十年前嘅第一代Clubman已經有咁嘅設計，嚟到今時今日仲咁實用，點可以唔讚MINI嘅體貼。
講開實用，其實對開式尾門亦比揭背車優勝，泊車時遇着車位太窄，又或後車唔識做，泊到鬼咁貼，你個尾門根本無位揭起，焗你泊過另一個位，激氣！有時只想到尾廂攞個袋、攞件褸，Clubman只需開半邊門就搞掂，都係嗰句，神高神大之人當然無問題，對女仔嚟講就會Buy呢啲細微設計，又實用又安全，唔怪得香港越嚟越多女仔揸MINI。
軸距長80mm 唔再頂腳
Clubman跟雙門版MINI其實好似樣，由車殼輪廓到車櫳Design，基本上有九成相似，只係車身長度加咗240mm，對MINI愛好者嚟講一樣咁鍾意，加上軸距跟隨車身齊齊加長，令前後排座椅空間更闊落，就算以前彈MINI細架又侷促嘅大男人，從此都會對呢個經典車系改觀。靚女Wing42"長腿，挨喺後排坐，膝頭哥都掂唔到前座，我仲叻，44"飛毛腿一樣唔頂腳，只係上落有啲辛苦啫，雙門車後座老問題，無計。
內櫳佈局跟普通版MINI無甚分別，較特別係今日呢架採用朱古力襯色做內櫳，啡加黑配搭得好順眼舒服，幾個銀邊位修飾得內櫳好靚，增加唔少時代感。中控台大大個錶提示你行車速度，細錶就顯示引擎轉數，加埋幾個冷氣風口、大細喇叭、開門手把全部圓形設計，圓圓碌碌、金銀滿屋，可愛得嚟又幾好意頭喎。
呢架Clubman為1.6NA偈，唔係有Turbo嘅CooperS版，120匹負載1,260kg車重，起跑尚算有心有力，行車表現留番下次試Turbo版先講，但不得不提係MINIHK除將車價由$285,300，減至$219,900外，仲提供埋MINIFinance上會計劃，以五年60期嚟計，月供只需$4,306，買新車都唔算太大負擔。
引擎：1,598c.c.直4DOHC
馬力：120hp/6,000rpm
扭力：160Nm/4,250rpm
傳動：6前速Steptronic半自動波，前驅
軸距：2,547mm
車重：1,260kg
查詢：MINIHK（31299020）
