南華足主羅傑承呢頭話科拿自薦加盟，唔夠12個鐘，澳職新球隊北昆士蘭狂怒（NorthQueenslandFury），就公佈簽入呢位前英格蘭國腳；難怪網民又一次高呼：「羅生吹水唔抹嘴。」我求大俠一直有跟進呢單新聞，當然亦有第一時間打畀羅足主求證下。
喺利物浦成名嘅科拿，上年12月同布力般流浪約滿後成為自由身；33歲嘅佢因投資地產有道，身家據講逾7,000萬鎊（約7.7億港元），但仍希望延續自己嘅足球事業，所以決定到人工低好多嘅亞洲球壇發展。
簽北昆士蘭狂怒兩年
聽羅生講，之前斟曼城訪港時識咗科拿嘅經理人；直至前日（周二），呢位經理人主動聯絡，話科拿有意到香港發展，但首要條件係一張兩至三年嘅合約。
羅生咁話：「能夠有國際級球星睇得起南華，我當然好高興，仲即刻搵贊助商商量，睇吓請唔請得起科拿；計過度過，南華最多只係畀到半季合約佢（南華與科拿經理人協議將金額保密），合約太長真係請唔起。」
同羅生講完電話冇耐，外國通訊社同網站就報道，科拿同北昆士蘭狂怒簽下一紙兩年合約，09/10球季正式登陸澳職，人工據報係200萬澳元（約1,000萬港元）。北昆士蘭狂怒同黃金海岸聯隊（GoldCoastUnited）係兩支來季新加入澳職嘅球隊，加埋目前8隊，新球季就有10隊角逐。
事實上，澳職球員人工雖然唔及歐洲，但一定好過香港；據報威靈頓鳳凰首席射手史美斯今季過檔黃金海岸聯隊後，年薪有成140萬澳元，差唔多佔咗半隊南華嘅班費。
幫英格蘭國家隊上陣26次嘅科拿，對於喺澳洲延續職業球員生涯回應：「對我嘅家庭來講，今次係一個重大決定；因為我哋會舉家搬到呢個被譽為地球其中一個最靚嘅地方（北昆士蘭），過新生活。」
岡野雅行投天水圍飛馬
南華唔能夠如願簽入科拿，羅生難免失望，最慘係俾人話佢成日吹水；我求大俠喺呢度想幫羅生攞番個公道，簽唔成科拿係因為唔夠澳職球隊爭。
至於之前嘅前日本國腳岡野雅行，經羅生一手引入後，最新消息話「野人」已經同南華姊妹球隊天水圍飛馬（天馬）取得共識，雙方簽約至季尾；今次「野人」變身「天馬」聖鬥士，睇吓可唔可以救救呢個悲情城巿啦！