股神畢菲特授權施羅德（AliceSchroeder）撰寫嘅傳記《雪球：畢菲特與人生經營》全球熱賣，皆因本書入面除咗講股神嘅投資心路歷程，仲有好多鮮為人知嘅秘聞，簡直將佢嘅一生巨細無遺咁裸露出嚟。
取消飯局惹猜疑
《紐約時報》話，雖然畢菲特事先講明唔會干涉施羅德嘅寫作自由，但本書出街後，兩個人嘅關係明顯疏遠咗好多，唔單只少咗見面，施羅德每年都會搞嘅畢菲特周年飯局，今年都取消埋，搞到兩人不和之說甚囂塵上。
為咗求證，《紐約時報》記者直接了當叫施羅德形容兩人𠵱家嘅關係。施羅德呆咗一陣，然後話同畢菲特仲有聯絡，但就冇以前見得咁密，佢仲同記者講，鍾意點估就點估，擺出一副「謠言止於智者」嘅態度。
男人最痛唔好提
聽消息人士講，畢菲特不滿自傳入面，寫佢細個嗰陣誤交損友，仲聯群結隊去偷嘢；而最令佢唔高興嘅，就係提及佢首段婚姻嘅內容。華華記得，本書入面講到畢菲特結婚後非常倚賴亡妻蘇珊，連佢嘅髮型都係由太座操刀，自己就專心一意研究投資，結果冷落嬌妻，搞到蘇珊對佢非常失望，仲有埋外遇㖭。
唔知係咪呢段「男人最痛」嘅綠帽秘聞，令到股神覺得冇面，所以嬲咗施羅德呢？
李華華
mailto:[email protected]