上年要數最佳功夫片，一定選《葉問》，片中對白仍歷歷在目，「收番你嘅虛偽」、「我要打十個！」，實在入心入肺，一份中國人尚武不尚戰的儒家熱血直湧上腦。戲中的林家棟被日本人打到遍體鱗傷，但現實生活中卻是真正「武痴林」，今次更與七小福中的元彬師傅，實行以武會友論一場不為人知的電影真功夫，細味師傅訴說七小福的一點一滴。
記者：蒙為亮
攝影：楊錦文
元彬
人稱冰哥，師承于占元，約六十年代加入「中國戲劇研究學院」，學習京劇和武術。滿師後加入邵氏從武師做起，多年來曾參與多部電影及電視劇的演出和擔任武指。
林家棟
於1988年參加無綫電視藝員訓練班第十五期加入演藝圈，《新上海灘》丁力時期都是以小生形象出現，之後的《大鬧廣昌隆》、《難兄難弟》等更坐正做男主角，近年轉戰影圈，曾參與多部杜琪峰的電影及近期大收的《葉問》。
武指難當
在訪問開初，家棟已經開門見山表示自己對打真是不太懂，只是鍾意吧。話雖如此，他其實早由TVB開始已經跟元彬師傅結緣，之後在林sir的電影中亦多次合作，令他一直有機會跟杜sir御用的武術指導元彬師傅討教，所以家棟雖然沒有認真拜師，但冰哥已經是他心目中的師傅。拍攝時冰哥指教一幕一幕的真功夫，已教家棟佩服得五體投地。
林家棟＝林
元彬＝元
元：家棟係叻仔嚟嘅，又勤力，好多時佢都會親身上陣，而且好多高難度動作，基本上都一教就識，可以講係話頭醒尾呀！
林：哈哈，你一開始就笠咁大頂高帽畀我，點接啊？師傅！唔好玩我好喎！唔通真係要我喺訪問之前先同你過兩招？哈哈！
元：我呢啲粗人，有嗰句講嗰句，實說實話，有乜好怕啫？
林：不過講真，同咁多位武指大哥合作過，當中跟你最投緣，記得我啱啱讀完訓練班之後，有部電視劇做第三男主角，有打鬥戲份，當時我對打真係一竅不通，唔知好彩定唔好彩，當時就遇到你。
元：當時個劇名我已經唔記得，不過仲記得部劇係偉仔做男主角，當時你乜都唔識，不過學打永遠都係唔識唔緊要，最重要有恒心，一日打得唔好睇，打到一個星期一定打得好，你嗰代嘅後生都算肯搏肯挨，𠵱家呢代真係差得遠。你仲記唔記得拍《神探》，你打到斷骨呀！
林：小小受傷一定有嘅，不過嗰場戲同南亞人打得咁激烈，睇番playback時，自己都唔係好信。
元：我話你得就得，我係師傅嘛！哈哈！
林：我哋做演員要拍打shot，一定要100%信武指，埋身打鬥戲頂多輕傷，不過一到爆破、飛車、槍戰等大場面，我哋乜都唔知就惟有靠武指，嗰刻佢教我哋做乜就做乜……
元：所以家棟你條命一直喺我手，哈哈！
林：睇到啦！我成日都話冰哥唔係「YesMan」，佢教你嘅動作唔可以SayNo，因為佢每次都會親身做一次，絕無欺場程度令人佩服，你試吓叫佢改啲易啲嘅動作，又唔信佢話擔心怕受傷吖嗱，冰哥真係同你認真打過！
元：一定啦！拍戲有時真係好難講，乜嘢意外都可以發生，有時啲演員受傷，我寧願係自己有事，我哋做武指嘅責任真係好大㗎，些少計算失誤就會搞出人命，會內疚一世㗎，所以我又點會亂咁教佢哋打吖。
發哥劉華難取替
觀眾看動作片時，總愛在刺激的打鬥場面中雞蛋裏挑骨頭，常常聲稱看穿他人用替身。但原來在現實片場中，用替身都絕非易事，因為個個演員都用替身，套戲未拍到一半就已經不夠錢埋尾。所以在港產片中，絕大多數的情況下都依然是真打真功夫。
元：一般追打跑跳都係真人拍嘅，尤其係男演員，就算take幾多個take都要親身上陣，只係爆破、飛車才有機會用替身。
林：而且早喺八、九十年代，唔係女主角，你都幾難有替身，就算男演員，要搵一個似自己嘅替身又要打得，仲要唔怕危險肯去拍，簡直係難過登天！
元：仲要唔係人人都搵到替身，好似周潤發、劉德華咁，大家對佢哋嘅外形太熟悉，誇張啲講句「多條毛都知」，所以佢哋都係親身上陣居多。不過𠵱家發仔喺荷李活梗係用替身啦，美國佬大把錢嘛，哈哈。
林：有次睇華仔拍《大隻佬》真係絕無欺場，幾乎全程自己打晒，佢真係好搏、好勤力。
元：無錯！聽我講啦，每一個武打明星都係要靠肯搏肯捱起家，七小福入面個個都係，對比𠵱家啲後生真係差得遠。講件真人真事你知，但無謂開名，九十年代中，我幫無綫一套電視劇做武指，男主角有一場打鬥戲，之前我親身示範要點打點轉身，跟住佢同我講：「師傅，使唔使呀！拍電視咋喎！」（神情激動）豈有此理！拍電視同電影有咩分別？拍電影嘅飛車同拍電視就唔同咩？電視都可以好認真！
林：其實嗰個係邊個呢？等我估吓先。
元：唔講啦！過咗去就算，何況之後我都無喺電視見過嗰個人。
林：（苦笑）唔係講緊我嘛……
元：點會呢！今年有無信心攞獎？我都有捧你場，好好歹歹都俾人打到腫晒，角色又討好。
林：算吧啦！由電視跳嚟電影圈都差不多十年，乜都化啦！你哋實話我「行」，但我真心覺得有無獎攞有乜所謂，最緊要演活劇入面嘅角色，令觀眾有共鳴。擔心無獎？不如拍多幾部好電影仲好啦！
七小福又豈止七個
在這個港產片產量不多的年頭，要找一部好的武術片或動作片，可為絕無僅有，打得好的都已升為神枱級老前輩，因而更令人懷念七小福打得興起的香港猛片年代，元華、元泰、元彪、元奎、元龍（洪金寶）、元樓（成龍）、元武，個個打得實而不華，難道一切就彷彿如歌名一樣《往事只能回味》？
林：我想問七小福入面邊個最好打？
元：你問我，一定答自己啦！仲使問阿貴？哈哈。你問成龍、洪金寶，答案都會一樣。但其實你知唔知「七小福」唔止七個人，只係每次演出都以七個人為單位，由師傅挑選。不過久而久之，觀眾都認定我哋幾個係，咁一叫又叫咗幾十年。
林：你又覺得有無機會再有新「七小福」呢？
元：應該難復再喇，因為根本唔會再有當時嘅人腳，呢一代嘅師徒關係唔同。
林：𠵱家都有好多武打明星，好似吳京、甄子丹等。
元：無錯，佢哋的確係武打明星，仲打得好華麗，但我哋當時拍打片係一個武打團隊去拍，一班師兄弟有功齊齊練，有飯齊齊開，同𠵱家獨立武術明星個體嘅性質唔同。
林：其實你有無諗退落嚟？打咗五十年喎，唔攰咩？
元：未諗過！我一日唔郁過都唔舒服，同埋拍打片真係好刺激，加上有時同班師兄弟圍埋傾偈話當年，師傅于占元當時點對付我哋十幾隻馬騮仔就好開心。仲記得當時練功真係好辛苦，師傅對我哋好嚴，有次罰我哋紮馬紮足大半日，諗起都腳仔軟。
林：全靠于師傅，你先五十幾歲仲身壯力健咋。
元：港台都有個特輯講番我哋當年七師兄弟嘅成長經歷，洪金寶仲專程由美國返嚟拍，嗰日啲師兄弟一齊食飯，大家都無咩點變，係我多咗個肚腩。
林：你哋真係咁多年感情都咁好？
元：係！好到你唔信。後生時以為兄弟一定會爭出位，點知大家相處得好融洽。雖然人大咗就各散東西，但一有事或過時過節就會食餐飯，有呢班師兄弟真係可謂今生無憾。
後記
兩個多鐘頭的訪問，冰哥家棟講講吓就會離題，講講吓又會爆吓影圈秘聞。武者口直心快，但每每都確實發乎情、止乎義的。問到冰哥做師傅不是要cool一點才型咩？「儍仔，cool有咩用，多啲同演員、導演溝通先可拍出好戲。」明白了，交流才是拍好武打片的真正王道。
《香港影武者．元班人馬》由香港電台電視部製作，主題正是圍繞七、八十年代叱咤武術影壇的元家班，被訪者包括洪金寶、成龍、元秋、元華、元武及其他徒弟等。
播映詳情：亞視本港台（逢星期六晚上7時30分）
