平安保險（2318）近排新聞一籮籮，繼總經理張子欣唔做富通集團（Fortis）董事，又傳富通賣資產畀法巴單刁，平保會投反對票。
發言人稱方案未落實
咁都唔只，噚日內地傳媒報道，平保打算喺深圳籌建平安國際金融中心作為公司總部大樓，樓高115層，主體建築高588米，今年上半年動工，2014年底完工，有望成為中國第一高樓。
平保董事長馬明哲年薪6600萬人仔，榮登《福布斯》「中國上市公司最貴老闆」寶座，已經俾人唱，家陣仲要起高樓做總部，仲唔俾人話你好大喜功！華華即刻打電話畀平保發言人問真啲，佢話個報道有啲誤解，平保成立20年嚟都冇總部，旗下子公司都係租寫字樓用，所以𠵱家有計劃喺深圳自己興建總部，符合發展需要。不過一切仍然計劃中，具體方案未落實，亦未有時間表。咁即係話，平保興建總部事在必行，至於係咪第一高樓，就有待商榷。
𠵱家內地第一高樓上海中心大廈，仍處於興建階段，主體建築高580米，業內人士估計投資額達150億人仔，以此推算，平安國際金融中心投資額至少過百億人仔。