年初九，最好影相笑笑口。煲呔噚日喺禮賓府舉行特首新春酒會，同各界人士團拜，煲呔話今年拜年唔講財源滾滾，因為大家近期最擔心、最唔想聽到嘅就係裁員，口口聲聲裁員、裁員，真係貪利是咩。煲呔又聲言如果有需要，會毫不猶豫推出更多措施「撐企業、保就業」。
酒會後政府新聞處發出幾張官方圖片，顯示煲呔同來賓言談甚歡，呢幾張相顯然經精心挑選，張張有睇頭。其中一張係近日人氣旺盛嘅甄子丹，佢套《葉問》叫好叫座，難怪煲呔要黐啲人氣，可能乘機請佢教番幾招，抵擋社民連出蕉。
發相力證信仰堅定
另一張相係同陳日君樞機合照，呢張相本應好平常，不過寶蓮寺釋智慧法師爆料指煲呔去年底微服去天壇大佛，煲呔明明係虔誠天主教徒，唔入教堂搵神父告解，卻入廟找大師指點迷津，有人思疑佢信仰有動搖。新聞處特別發出煲呔同陳樞機合照，補鑊澄清意味甚濃，以示煲呔心中仍然只有一個神，滿天神佛與佢無關。
汪阿姐噚日都有去禮賓府，新聞處發出一張佢同煲呔合照。阿姐近日因不滿政府唔幫粵劇界續租新光戲院，又對八和申請北九龍裁判法院大樓轉做粵劇發展中心諸多阻撓，頻頻開記者會批評官員，煲呔噚日同阿姐咁好傾，相信已𠱁掂阿姐收口。咁都唔止，煲呔噚晚又同太太夜到北角新光睇粵劇，又去後台問候大老倌，以示支持粵劇。
美國探親後聲沙沙
車公靈籤話香港「內有家鬼」，煲呔噚日冇透露如何捉鬼降妖，只係話喺經濟低迷情況下，市民悲觀可以理解，佢認為悲觀唔係問題，只要唔氣餒、唔妥協就得，不過佢承認冇人知最壞時刻是否已經過去，今年好可能係非常困難嘅一年。有出席酒會人士話煲呔氣色麻麻，原來佢農曆年假期去美國探親時，因為當地天氣亁燥而喉嚨聲沙，曾太聲沙沙咁話，要煲啲滋潤湯水畀老公潤喉。
mailto:[email protected]