地產代理舊年年中開始嘅裁員行動，喺金融海嘯爆發後加速，行業仲俾人形容為要進入族群滅絕嘅「冰河時期」，單係四大代理，舊年底已經「殺咗」超過1000個代理。其中行動最快嘅利嘉閣，董事總經理廖偉強噚日同記者新年團拜時就話，舊年底見到樓市開始定番，發展商又肯賣番樓，所以開始加番大概50人，九成都係有經驗嘅，咁樣一手同二手市場都可以同人fight。不過，今年都係穩中求發展，𠵱家人手大約1000，增減希望維持喺5%之內上落，分行就唔加住。
至於同樣有請人嘅香港置業，行政總裁李志成話，公司條一手team舊年做得唔錯，營業額有千三萬，所以喺年底開始想透過調配同請人，將人手由20個加到40個，應付未來發展商推盤，同做好啲二手樓市場，𠵱家諗住由舊年最少時510個，加到550個，但要睇嚟緊個市點先。
中原：唔想呢一刻請人
至於兩大龍頭行中原地產同美聯物業（1200），就話今年人同行都唔會加住。中原住宅部董事總經理陳永傑話，大家都知今年經濟環境係點㗎啦，唔想呢一刻請人，遲啲又炒咗佢，盞搞；𠵱家最緊要係持盈保泰，盡量做到收支平衡同唔炒人，有錢賺更加好。美聯高級執行董事黃錦康早兩日已經講明，今年樓市好難測，「能見度」好低，公司冇任何擴充計劃喎。
李華華
mailto:[email protected]