嘩，好惡！邊位？Alphard？唔信！Alphard一向賣豪華家庭Feel，個Look溫馴有貴氣……哦，原來呢趟靚太悶悶哋，要搞搞新意思，出吓位，扮辣妹。簡簡單單加番套日本Wald嘅專屬改裝部件，襯埋原身嘅巨無霸身形，即時係威係勢惡通街。不過咁，兇你都係擺姿態，阿太顧家又安全嘅本質不變。
記者：黎頌詩
攝影：林栢鈞
Model：Winnie
扮辣三招
第一招：全車大包圍$39,800
第二招：一體式鬼面罩$4,800
第三招：120mm四出尾喉排氣嘴$3,000
查詢：WaldHK（28388410）
註：Wald專屬改裝部件，未連人工
裝假狗嚇窒你
由日本Wald推出無耐嘅專屬改裝部為幕後策劃，為高貴掛帥嘅Alphard裝身扮惡霸，變身只需三大招。第一招，全車大包圍，頭包圍係霸氣升級嘅重點，向前方及兩邊誇張地伸展嘅頭鏟，將原本簡約嘅線條型格化，原本呈長形嘅霧燈換成左右各兩盞小圓燈，減老氣加活潑感。第二招，改頭換面鬼面罩，色調同車身同出一轍嘅硬朗橫欄柵鬼面罩，取代貴氣電鍍原裝版本，上面嘅徽章亦一併消失，總之義無反顧以新形象示人。車側裙腳驟眼睇有啲平凡，不過睇真啲，搞乜鬼門邊會有鯊魚鰓？原來純粹玩嘢之作，並無通風效能。講到玩嘢，第三招最爆，省鏡嘅黑色擾流，打破本來嘅沉悶感，但最嚇鬼嘅係左右兩邊嘅四出尾喉，勁成咁？梗唔係，又係一招裝假狗。真嘅一樣，睇得又嚇得，呢招女人最理解。改裝造工貴幾倍，仲加重量，有違純粹扮嘢嘅原則。
顧家本色不變
今次WaldVersion為Alphard進行嘅只限於外觀打扮；外表夠辣，但內裏依然保持顧家本色。性能上無加辣，不過3.5Alphard一向以好力見稱，低扭強勁之餘，起步竟然仲可以有爆發力，高車身亦無損走彎時嘅平穩暢順。叫得做「陸上行宮」，性格本來就好鮮明，Sell嘆Sell實用，攞去劈？搞笑啦！內櫳家庭味就一樣紋風不動，七座位夠晒一家大細家庭樂；首兩排超豪Ottoman座椅提供嘅係非一般乘車享受；抬頭兩個大天窗，開揚感一樣超級。唔睇風景又可以拉下天花上嘅LCD顯示屏睇影碟同打機，唔怕細路悶扭計。豪如Alphard亦一樣「搬得」，一下子就變出如貨Van般嘅載物空間㖭！加辣Look全能靚太，真係認真抵錫。
1.線條誇張嘅頭唇，令車頭風格更具強烈戰鬥格。
2.霧燈一開二，仲由菱形變圓形，活潑好多。
3.低調包圍令車身感覺坐得更低更具跑味。
4.四出尾喉嚇你一驚，原來都係純粹擺姿態。
5.細路扭計要瞓陣？中排變床隨時瞓都得。
6.唔使嚇親，大成咁嘅置物空間Alphard一下子就變得出。
7.天花可拉下顯示屏，一家大細隨時有娛樂。
Alphard350SuperDeluxe
引擎：3,456c.c.V6雙VVT-i
馬力：274ps/6,200rpm
扭力：340Nm/4,700rpm
傳動：6前速加減波
查詢：28661020（皇冠汽車）
售價：$561,000
