每次睇古德明專欄，梗有嘢學到，尤其是歷史故事方面，一月三十一日古德明講「誰是潘仁美」，還宋朝名將潘美一個清白，澄清京劇《楊家將》的誤解，左丁山睇完，自覺得益不少。大陸好多城市為咗爭取旅遊收益，往往挖空心思嚟搞旅遊點，有乜好得過吃老本，以中國老祖宗遺產嚟吸引遊客呢？到中國旅遊，睇故宮、長城、雍和宮、西安唐代遺蹟等等，無一不是我哋老祖宗遺留落嚟嘅，山東榮成市成立一個所謂「奸臣紀念館」之本意，並非紀念歷史人物，而係巧立名目辦旅遊點搵錢而已，邊會考證潘美不是潘仁美或者宋代根本冇一個名將叫做潘仁美吖。
古德明又講到毛澤東「滿腹的國學」無非《紅樓夢》、《西廂記》，一般通俗演義，不懂歷史。但根據前貴州省委黨校教授尹振環一篇發表於《明報月刊》一月號之大作：毛澤東的皇權專制主義──《剖析秦家店》，原來毛澤東自己猛讀書，但公開談話就叫人唔好讀書，「書不要讀得太多，讀幾十本就夠了」，但佢自己呢？一九五二年毛澤東取得一部亁隆武英殿本線裝書《二十四史》，共八百五十冊，時時勤讀，又讀《資治通鑑》，各朝代的「紀事本末」，從一九五二到一九七六共二十四年，讀咗八千萬字中國歷史，所以此人讀書勤力之至，但推行愚民政策，詆毀知識分子為臭老九，一九六四年二月二十三日講：「書不能讀得太多」，一九六四年三月十日講：「鑽到書本中去學習，越學越沒知識」；又話：「書可以讀一點，但是讀多了害人，的確害人，革命鬥爭培養幹部」，一九六五年六月二十六日講：「書讀得越多越蠢。」
毛澤東可能正因為讀得中國歷史越多，變得越腦袋硬化僵化。據尹振環先生講，毛澤東從不讀現代西方典籍，不研究世界現代化，只係從中國歷史上申、韓法家中學習權謀權術，無怪成日整人害人，成為現代人魔。欲知道毛澤東之讀書詳情，可買本《明報月刊》睇吓，左丁山就睇到毛骨聳然。領導人嘅書單有啓示性，據IHT一篇報導，喬治布殊讀書甚多，一年有近百本，以Howto（香港叫做雞精書）書，實用戰略書為主，奧巴馬讀書就以大師級小說劇本（如莎士比亞，ToniMorrison）及哲學性探討人生難題無肯定答案嘅書為主，故此奧巴馬之思維與布殊完全不同。