之前聽一位做財務策劃師嘅朋友講，唔同嘅客有唔同嘅投資習慣。好似佢有好多做醫護人員嘅客，買埋好多保險。敏妮起初聽，以為係因為醫護人員見到太多生離死別，所以覺得好需要有保障，點知財務策劃師朋友講，只係因為醫護人員需要輪班工作，唔得閒睇住自己嘅投資組合，認為最簡單就係買有投資成份嘅保險，一來有保障，二來亦有投資收益。
買得多未必好
唔使多講，買保險當投資，敏妮聽完就擰晒頭，但佢提醒咗敏妮，的確有好多人喺不知不覺下，買咗好多保險產品而不自覺。對於保險有好多人有誤解，敏妮最近見到有篇文章，講咗20個錯誤嘅保險觀念，都係老生常談，但又的確被人忽略。
好似保險係咪買得越多越好？錯！因為保險嘅目的係獲得財務補償，避免因意外或者疾病發生，導致家庭經濟受影響。喺保險世界唔一定平嘢冇好，一份30萬嘅傳統壽險，保費可能夠買一份保額過百萬嘅定期壽險。
另一個誤解係，買咗保險之後，就可以安枕無憂。答案又錯，好多人年輕時買保險，之後冇定期review，結果可能份保單已經唔切合實際需求，好似年紀大咗，醫療保險嘅需求增加，又或者已經成家立室，要為老婆仔女加多啲保障咁。
捧親友場手尾長
文章提到最大誤解係，親友做保險經紀，叫到你買，惟有捧場。作者話呢啲「人情險」會有好多手尾跟，原因係人情重於專業，有人買咗自己都睇唔明嘅保單，以為有乜嘢事，搵番個親戚朋友，佢哋一定幫你跟到足，結果唔止金錢損失，隨時親友反目。
呢個時代，保險已經越嚟越普及，一個人可能唔止一份保單，但真正了解保險需要，買到適合自己保單嘅人，又似乎唔係咁多。
溫敏妮
http://wanmanli.com/blogs/