自由黨舊年立會選舉慘敗，被指同中聯辦唔過票有關，雙方關係陷入冰點，牛年終於解凍，主席劉健儀噚日率眾去西環向主任高祀仁、副主任彭清華、黎桂康等拜年，高祀仁大讚自由黨，表示會一如既往加強聯繫同溝通。
退黨三人組搞智庫
高祀仁發言時，叫自由黨要冷靜分析形勢變化，調整思路，明確方向，改革創新，重新出發，進一步提高整體實力和參政議政水平，提高社會地位和影響力。頭兩句應該係針對田少、周梁等人而講，「提高整體實力和參政議政水平」，則係對自由黨新領導層指示。
至於退黨嘅梁劉柔芬、林健鋒同梁君彥，始終未能另起爐灶，退而求其次辦智庫，會請四、五名職員做研究。林健鋒話會邀請政治同經濟專家討論政策，可能會提交建議畀政府。退黨三人組本來想拉攏其他獨立議員結盟，但至今仍處於同枱食飯各自修行階段，IT界譚偉豪話五個獨立議員無意同三人埋堆，又指發叔係新界人，同專業人士思維唔同，意味發叔入行會，都箍唔到佢哋五票。