俗語有云：「好馬不吃回頭草」。利物浦前鋒羅比堅尼1月重返熱刺，我求大俠唔敢講佢唔係匹好馬，不過肯定係匹臭馬、貴馬。唔同意？冇正選踢就發難，一個入波值成118萬鎊（約1,299萬港元），咁嘅馬唔貴唔臭咩？
或做隊長迎擊阿仙奴
先篤篤計數機先，羅比堅尼去年夏天由熱刺以2,030萬鎊加盟利物浦，周一佢以1,200萬鎊（約1.3億港元）重返熱刺，紅軍賬面即蝕830萬鎊！大家咪忘記舊年8月，1英鎊仲兌緊1.86美元，到周一已跌至1兌1.48美元。之後計埋成本效益，佢上陣28場入7球波，平均每球118萬鎊；上陣1,578分鐘，平均每分鐘5,070鎊！唔知紅軍兩位美國老闆，睇到呢盤數會唔會暈低呢？
當然，一次成敗不足以論英雄，羅比堅尼先後效力6支球隊，其中包括意甲勁旅國際米蘭，累積總轉會費高達7,030萬鎊！雖然比唔上累積轉會費達8,500萬鎊嘅安歷卡，不過已經證明佢嘅實力同潛力。熱刺領隊哈里列納仲承諾，將來畀埋個隊長臂章佢戴㖭，如果下周日京治對阿仙奴出唔到，佢就好大機會以隊長身份領軍。熱刺日前仲執咗占邦達同迪科爾回巢，睇嚟哈利列納深明呢班回頭馬，喺出面受完氣返到嚟，肯定將火氣轉為動力，如果喺倫敦打吡贏到艾沙維助陣嘅阿仙奴就威囉！
賓帥「去英國化」得咗
利物浦方面亦衰唔得晒！英倫3島兵賓納同羅比堅尼離隊後，成隊波得番謝拉特同加歷查兩件主力英國兵，領隊賓尼迪斯嘅「去英國化」終於可以實現，難怪最近續約亦開始明朗化。我求大俠唔係歧視土炮，只係覺得領隊應該有權建立一支屬於自己嘅球隊，如果隊長謝拉特戰術理念唔配合，都好應該走人，因為冇人比賓尼迪斯更了解隊波！
我求大俠覺得賓尼迪斯應該掌握轉會話事權，呢次羅比堅尼嘅失敗就係高層亂買人嘅後果，相信老闆應該醒啦！好啦！各位紅軍迷可以準備迎接賓尼迪斯嘅新時代，一個打法快速、技術更好嘅紅軍，係咪諗吓都興奮呢？