孫柏文睇某美帝大報，發覺佢哋呢排寫關於大陸經濟嘅題材，基本上就係溫總應該會歸類為「唱衰中國」嘅稿。佢哋特別鍾意講啲關於民工回鄉後，返唔到沿岸工廠再搵工做嘅故事。有次，佢就寫話當好多千萬民工「失業」時，就會爆發社會暴亂，中央官員驚亂，所以係都要「保八」。
開發內陸好時機
睇完忍唔住覆佢，我話沿岸工廠冇工，令民工回鄉其實係歸田，就咁一刀切話佢哋「失業」，實在太低估班民工。今次，其實係大陸開發內陸嘅大好時機。
民工，當年離鄉別井、千里迢迢去打工，證明錢雖然冇，不過膽識過人、心中有團火。一班咁嘅人，呢幾年喺沿岸地區打工，希望不但儲咗少少錢，仲要呢幾年有擘大隻眼、小心聆聽，同問咗啲啱嘅問題。佢哋呢幾年嚟，如果醒目，係會吸收咗好多營商知識，眼界大開。
會似港人富起來
當突然間，佢哋大規模歸田，呢班心中有團火、手上有啲資金、眼界被擴闊咗嘅人，你覺得會甘心失業、無所事事咩？我呢個民工歸田搞活內陸概念，你唔會喺啲官員、專家、分析師口中聽到，因為唔似啲大興土木投資，冇數據可被測。唯一會信呢個概念就係你，香港人。因為當年我哋就係咁樣富起來。
咁有冇概念股？有，聯想（992）。點解？自己諗諗。
孫柏文
http://phatdat.blogspot.com