傳統春節，多買意頭好的梅蘭菊竹作擺設。而當這些富中國色彩的植物化身成冷感的鐵片燈飾花，頓時令歐洲人趨之若鶩。半途出家的香港本土設計師林子康（Max），開設的燈飾公司OWINDO，以高檔設計中檔價錢，將自家燈飾成功打入歐洲市場，希望讓人知道中國設計唔係得個「平」字。
記者：林佩婷
攝影：楊錦文
《Mums》
四君子的菊花為近期作品，為免多重的花瓣令菊花外形變得論盡，故簡單變成兩瓣，令折射效果更好。$3,600（小）
《風》
正面有光反射，後面陰影位看似陣旋風，幾有過節的風車Feel。$2,600（小）
《C.C.C》
新作利用圓形古代銅錢組合成很美的光線折射。$5,330（中）
反傳統鐵片代水晶
傳統認為水晶燈感覺高貴，既然Max將自家燈飾定位中高檔次，或多或少該利用一下此物料，誰知他設計的燈飾全是選用給人冰冷感覺的鐵片製造，Max說這是他的堅持。「由八十、九十年代開始，香港以水晶燈作為主導，我就想打破呢個觀念。其實鐵片都可以做到好大體，變化好多，好似加電鍍或噴漆等又有唔同效果。」為力臻完美，由繪圖到完成，一盞燈平均要用3個月至1年，當中又有20%會胎死腹中，「好似第一盞設計《風》，初初做出嚟嘅鐵片超鋒利，根本過唔到安全要求，改咗十幾次先過關，亦可以話係最受歡迎設計之一，賣咗幾千盞。」
不望神州 進軍歐洲
由04年至現在，他約設計了40多盞燈，其中不乏富中國傳統色彩的主題，如梅、菊、竹，甚至中國古代銅錢。是否決心打入歐洲市場的媚外設計？Max解畫：「即使設立咗燈飾公司，我都無喺香港發展住，因為香港人買燈飾一向覺得外國較好。高檔次會選外國，否則就揀最平嘅中國製造。我啲燈走中檔路線，即係設計同歐洲差唔多質素但價錢較平，應該符合歐洲人心目中選擇。而且喺外地打出名堂後再返內地或本土發展仲好。」難怪當人人北望神州，但Max卻偏反其道而行，先進軍歐洲設計王國，確不無道理。
半途出家燈謎寓意
別看Max現時的燈飾生意站穩陣腳，設計意念不絕，其實最初他是設計外行人。「屋企人做開裝修工程生意，認為呢行辛苦，所以唔想我入行。畢業後我喺銀行工作，為興趣公餘時進修設計課程。後嚟阿哥個客想搵人設計兩盞燈，我就搶嚟試，結果客人好滿意，於是喺家人支持下轉行，幾經摸索並到美國等地參展，最終能進軍歐洲市場。」
Max話每盞燈有不同寓意：《Coil》利用隧道表達人生旅程、《Tube》表示人與人關係等。「設計意念係好個人嘅，好似《菊》有人覺得似日本菊花或蓮花，有人看得出固然開心，即使未必理解我嘅創作意念，但都可啓發想像。」
