金融海嘯爆發後，好多公司都要諗計增加收入來源，去對抗不斷轉差嘅經濟環境。好似信和置業（083）旗下嘅大角嘴奧海城商場，佢哋商場推廣部由今年開始擴充服務範圍，做埋公關公司嗰瓣，提供對外公關服務。
聽信置物業管理總經理（商場推廣）蘇蔡潔蓮講，𠵱家主要服務對象係自己旗下商場嘅租戶，實行一條龍服務，提供公關活動策劃、市場推廣、籌辦記者招待會、周年晚會等，仲包埋出新聞稿，唔使等班客仔要出去搵其他公關公司做。暫時就接咗兩單生意，仲有5單傾緊，不過佢話做生不如做熟，一定唔會coldcall搵客喎。
奧海城公關加辛唔加人
商場推廣部家吓得7個人，但蘇太就話，冇諗過因為拓展業務而請多幾個，因為奧海城每年都有成800幾個宣傳活動，全部都係由佢哋幾個人一手包辦，從來唔使假手於人，所以唔擔心應付唔嚟咁話。