哀衣斯（Oishi）！我求大俠最愛魚生壽司，而連續兩年都由港人喺日本築地魚市場投得嘅「日本一」藍鰭吞拿魚，香港人亦有份品嚐，真係有幸。不過，原來利物浦班西班牙兵，都有炮製日本菜嘅喜好，果真估唔到！
受埋愛華頓阿迪達玩
球員平時比賽咁多，壓力都好大，一般球員球員就鍾意打吓高爾夫球、桌球，同埋打遊戲機減壓；有名有利嘅，好似基斯坦奴朗拿度、碧咸呢類超級球星，鍾情玩車，坐擁十架八架名貴跑車可謂濕濕碎。不過，費蘭度托利斯（F托利斯）、尼亞拿、連拿同埋沙比阿朗素就鍾意玩吓煮飯仔，不過唔係煮西班牙菜喎，而係我求大俠至愛嘅日本菜。
其實有唔少醫生、律師等專業人士，都會用煮嘢食嚟當作減壓一部份，但喺英倫球壇嚟講，呢類減壓方法就好少見。據講，連拿、F托利斯等4位人兄平時最鍾意整魚生壽司同拉麵，而佢哋仲受埋紅軍同市宿敵愛華頓中場阿迪達一齊玩，實行成班同鄉齊齊做日本廚神。
西班牙仔齊煮飯增默契
至於利物浦教練團，亦好贊成班西班牙兵約埋齊齊整壽司，皆因呢類日本菜出名健康，基本上冇咩食油成份，又唔熱氣、又唔肥膩，整嘅過程又可以增進吓隊友之間嘅感情同默契，唔怪得知紅軍今季喺聯賽成績咁好，連主場大戰車路士都贏埋，F托利斯仲包辦兩個「士哥」，可能食得魚生壽司多，都對狀態有幫助！
不過，講到紅軍爭奪英超錦標機會，相信呢班西班牙兵仲要加多幾錢肉緊，因為贏咗車仔之後，佢哋仲爭曼聯兩分，而且多打一場；足智彩嘅冠軍賠率亦都有幾大差距，紅魔鬼只得1.2倍，而紅軍就6倍，呢刻完全睇好紅魔鬼奪冠。紅軍嚟緊聯賽嘅對手將會喺樸茅、曼城同米堡，3隊中有兩隊要打護級戰，而曼城又要同老細交代成績，都唔係易打，怕且F托利斯要食多啲魚生壽司，補充吓體力至得囉！