賭王何鴻燊過去多年捐獻澳洲工黨超過140萬澳元（約680萬港元），引起袋鼠國傳媒譁然。報道話，由2000年開始，賭王不斷以個人、四姨太以至相關公司嘅名義捐錢畀澳洲工黨。貿貿然咁多政治捐獻，人哋都唔敢受晒，其中由四姨太捐出嘅50萬澳元，工黨就拒絕咗。
為乜賭王對澳洲工黨咁慷慨呢？當地報章指，賭王家族喺澳洲有唔少生意，非凡航空喺2007年開通咗來往悉尼同澳門嘅航線，何猷龍就同皇冠賭場合作，喺維多利亞同西澳兩個省投得賭牌，賭王自己喺澳洲都有唔少旅遊同物業生意。
據報道賭王仲想奪取新南威爾斯第二個賭牌，不過澳洲政府就梗係唔益過江龍，所以賭牌最終落喺澳洲賭場一哥Tabcorp手上。