港大校長徐立之流年不利，真正禍不單行。首先係佢趁農曆年假返加拿大同家人團聚，點知徐老太住嘅老人院爆發傳染病，院友要被隔離，一家人唔可以坐埋食團年飯，佢返港後又感染流感，要戴口罩同人拜年。
護照到期無緣赴台
咁都唔止，徐立之原本呢個星期尾去台灣參加學術會議，點知本加拿大護照有效期唔夠半年不能入台，唔夠時間辦續證手續，惟有望門興嘆；而佢為參加呢個會議，冇報名跑今年渣打馬拉松，𠵱家兩頭唔到岸，搞到「雙失」，佢勁無奈，不過校長話會為港大學生、校友打氣，希望大家跑到好成績。
港大高層噚日同傳媒團拜，有線電視新聞部總採訪主任徐佩瑩都在場，原來佢做到今個月20號就拜拜，下月17號轉做港大外務處副處長。94年亞視新聞部有六名高層不滿禁播六四特輯集體劈炮，徐佩瑩係當年「六君子」之一。有線新聞部近日多人事變動，八方聽聞有唔少人獲擢升頂替離職者，升職又加人工，可喜可賀。