社民連噚日喺佐敦總部天台搞BBQ開年，由陳偉業親自下廚，原來佢今年8月榮升外父，大女Alysia喺加拿大擺酒，早排返港辦嫁妝。一講起嫁女，陳偉業即時笑到見牙唔見眼，大讚未來女婿100分。
黨主席毓民噚日都好開心，因為今年社民連年宵攤位大豐收，埋單計數有近20萬元收入，其中賣到斷市嘅蕉形雙截棍玩具可能復刻加推。
長毛平日都幾火爆，噚日BBQ時㷫上加㷫，話今日社民連見財爺時，將有好嘢送畀佢，又話唔排除會喺民主黨提出譴責政府押後政改諮詢嘅動議入面，加入要求煲呔停止狗噏。鬧完煲呔，長毛又抦律政司司長黃仁龍，指佢近日頻頻用陰招玩針對，仲衰過梁愛詩，因為詩姐仲有羞恥之心。