和林曉峰做訪問，一講起兩個囝囝就最起勁。「𠵱家邊揸到跑車吖，得兩個位，載唔到啲𡃁仔呀！」、「我問我個大仔鍾意咩車，佢話鍾意LightningMcQueen（《反斗車王》中紅色跑車），所以我架Fiat500都係紅色，𡃁仔話似MiniLightningMcQueen，哈哈！」、「七人車梗係要電趟門啦，接放學㩒個掣就可以抱住佢哋衝上車。」
有仔萬事足好似係男人必經階段，我好驚，過多幾年，我會唔會為咗個仔唔打麻雀，轉玩飛行棋？玩幾錢隻先？
文：嘴嚼爺
攝影：陳盛臣
踩mini踩到冒煙
約阿Lo試車，佢話試JeepWrangler，但係就唔啱時間；再唔係09年日產Cube，未返貨喎老友；到最後，佢揀AlphardHybrid，但初四又要去新加坡旅行，時間緊迫惟有班架07年款AlphardHybrid改四座位豪版。「我之前都試過，慳油環保都係新趨勢，而且坐同揸都好舒服，我好鍾意啲車有多啲機關，雪櫃呀暗格呀杯架呀……不過因為車身太高，最後揀咗Estima。」林曉峰對汽車好有研究，「幾年前你求其問我一架車，我都噏到個車價你聽。」更喜歡古董車，「Dreamcar係Porsche356，幾年前有架賣60萬，但我覺得頂籠值24萬，所以無買。」自己則擁有過古董「哦𡃁之Van」，「好舒服，不過真係整到儍。」仲有借大佬林海峰架舊款miniCooper，「唔好話呀，mini好坐又幾好力，我試過起步辣贏的士㗎，不過又試過行緊東廊冧偈，燒偈油出白煙。勁呀嗰次，咁大個仔都未試過晏晝5、6點喺東廊前後幾個車位無車敢埋身！又死火又撻車又死火又撻車……」
老蘭遊車河
10歲大仔鍾意卡通車，咁9歲細仔呢？「細嗰個話鍾意Ferrari。我問佢第時會唔會揸車呀？佢話：『唔會喎，我買畀你車我吖嘛！』我都係整定做中港司機㗎喇。」咁平時揸車除代步外，去邊玩多呢？「好鍾意行超級市場，所以架車一定要大。送貨？自己買完拎返屋企先過癮吖嘛。」遊車河呢？「揸去老蘭同啲仔睇吓靚女囉，唔好大個見到咩女仔都話靚女嘛，話畀佢哋知呢個世界有好多選擇嘅。喂，啲新抱同我兩公婆過世㗎，靚好過醜啦！」換轉係我，我會車去油尖旺，讓孩兒培養警戒心，提防港女埋身。
前輩錢嘉樂
我最鍾意煽風點火，所以重提舊事，話說約一年前訪問錢嘉樂，講到佢同阿Lo打機玩《GT4》：「阿Lo入彎唔收油梗係贏啦，我哋呢啲先係真正車手。」一年後複述番畀阿Lo聽，即時一輪嘴：「呢啲咪唔識靈活變通同無智慧囉，一味淨係識耍功夫用蠻力囉。玩遊戲機要夠了解，我呢啲人就八卦，以前我細個住尖沙嘴，日日放學搭船買車書槍書漫畫書，咩都睇咩都研究，同人哋吹水有得講嘛。佢就唔係嘅，打機淨係買部機買部電視買張凳擺喺度。以幾十年前啲舊賽車Game玩踭趾喎，呢啲人真係……唉，可能佢年紀大諗唔到咁多嘢……」終於停落嚟，省起話晒係相識一場，「不過我𠵱家做〈Oh！Mydear！〉呢個講車節目，都要搵佢做我幕後顧問嘅，始終有好多嘢都要問吓啲老人家，呀，唔係，係前輩。佢人生經驗咁豐富……」哈哈，爽！我份人黑心，希望嘉樂有幸睇到呢篇訪問。
ToyotaAlphard2.4Hybrid
引擎：2.4公升直四引擎+電馬達
馬力/扭力：131ps/19.4kgm
傳動：無段變速，E-Four四驅
售價：$669,000
查詢：富利堡汽車（28776700）