新鴻基地產（016）大股東郭氏三兄弟內訌，喺年初八再有新發展。新地噚日公佈，獨立非執行董事鍾士元辭職，希望有更多時間專注個人事務，本月1日起生效。
據講，大Sir係唯一比較企喺前主席、大佬郭炳湘嗰邊嘅董事，連佢都走埋，大郭好可能大勢已去。
郭炳湘聲明句句有骨
大Sir似乎辭職得好突然，新地嘅通告只話佢辭職，冇公佈替代人選。郭炳湘噚晚就發表私人聲明，對鍾士元突然辭職感到十分可惜，話大Sir履行咗獨立非執董應盡嘅職責，佢離任係新地嘅重大損失。
郭炳湘形容大Sir「正直敢言，待人處事公道敦厚，公私分明，尤其值得佢哋後輩學習」，字裏行間，充滿感激之情，但又好似有骨。
郭炳湘早於01年邀請大Sir擔任新地獨立非執董，聽講，舊年佢同兩個細佬，即董事總經理郭炳江同郭炳聯勢成水火時，鍾士元不時有幫口講幾句，想做和事佬，可惜唔成功。
不過咁，又有人話，新地舊年5月召開董事會，投票係咪將郭炳湘調任非執董時，除咗大郭自己，其他董事一致通過議案，暗示鍾士元只係幫口，冇幫手。
雖然今次大Sir辭咗新地份非執董職務，但暫時仍然係新地旗下載通（062），以及中電（002）嘅獨立非執董。
李華華
mailto:[email protected]