黎明（Leon）在昨日大年初八率領旗下Amusic藝人回九龍塘公司團拜，衞蘭、衞詩一早回公司等𢭃老闆的利是，而今日35歲牛一的楊千嬅則缺席，Leon語帶雙關說：「攞咗最受歡迎女歌星，喺新正頭肯定比其他人忙啲，攞咗唔勤力之後點攞呢。」
黎明和Amusic一班歌手昨日大年初八擇定吉時回九龍塘公司團拜，旗下歌手衞蘭、衞詩、應昌佑等一早到場，不少Leon的歌迷及傳媒早於8時已在場等候，不過老闆Leon就姍姍來遲，至9時半才到達，至於與他屢傳不和的楊千嬅更以放假為由缺席，有指身為Amusic一姐的千嬅年底將約滿，早前就傳出她會過檔林建岳的東亞唱片，昨日缺席，即令人揣測今日35歲牛一的千嬅生日大過天，認真唔畀面。
「有緣就會留低」
雖然千嬅不來撐場，但無損Leon的心情，他甫到場即大派利是給員工，之後更率領旗下藝人上香祈福，但卻不慎露底。對於千嬅缺席一事，Leon坦言事前已得知，但他沒有詢問她是否不在香港，只強調不覺得千嬅唔畀面，更語帶雙關說：「攞咗最受歡迎女歌星，喺新正頭肯定比其他人忙啲，攞咗唔勤力之後點攞呢，初八拜神都係想大家開工大吉。」
有傳千嬅年底約滿將過檔東亞，Leon就強調說：「冇呢個問題，我哋做藝人係隨住音樂嘅自由行者，去到邊度有緣就會留低，唔會一生一世喺一間公司，佢唔喺Amusic大家係朋友，佢喺Amusic大家就係好朋友，就係咁簡單，做音樂嘅人唔想用呢啲做新聞點。」
嘲女友整糕手藝
Leon透露今個農曆年留在家中休息，對於有否品嚐女友樂基兒悉心炮製的蘿蔔糕時，他即抵死地說：「我應該有食，因為件件差唔多，我冇刻意問，都係一pat嘢。」對於有指樂基兒以老闆娘身份大派利是，Leon即肉緊地否認其事，並指怕其他人都會伸手向她攞利是，Leon又稱暫時沒有派雙封利是的計劃。
對於好友李嘉欣懷孕的傳聞，Leon大反應說：「死啦！呢啲更加唔會問，大家係好朋友識做，由dayone開始唔會問，就算佢同我報喜都唔會同你哋講，做朋友係講義氣，除非佢自己講就會恭喜佢，不過暫時我就未聽到。」
採訪：駱華齡
攝影：仇志德
