新年團拜，見到成班人都係交換公司裁員、爭取歐美訂單嘅消息，想搵件利好消息都難。經紀L來電恭喜發財，順便叫左丁山唱好，不要唱淡，希望可以振奮人心。左丁山不禁苦笑：「傳媒都係報導事實啫，美國不景，日本工業產值萎縮百分之九點六，全球失業人數增加，銀行壞賬不止，請問有乜消息畀我唱好？」經紀L堅持要唱好，話最好杯葛大摩唱淡滙豐嘅報告，不予理會。經紀L把聲線好好聽，但呢勻大聲到幾乎震斷電話線：「滙豐跌成咁，繼續跌落去，你估香港人好好玩咩，啲洋人不懷好心，唱淡滙豐，你唔好人云亦云！」
原來經紀L愛港情切，驚住滙豐股價再跌，會動搖港人信心。唉，香港係言論自由社會，好難阻止洋人唱淡嘅啫，由市民用銀紙投票決定啦。新春期間，唔少人留港消費，起碼支持吓香港內需先，譬如年卅晚，大記者去沙田花市、界限界花墟，發現啲花賣到斷市，係佢近二十年所未見，咪係市民唔怕使錢嘅一個跡象囉。建築邦過年前趕住到吉之島買入一個42吋平面高清電視，附帶買多兩件電器，頻呼「抵玩」，左丁山仲以為佢有錢唔怕使㖭。但建築邦話：「唔係噃，吉之島年尾推出一個『福祿壽』套餐，$8888可以揀一件大兩件小，抵到爛，聽講『套餐』銷售一空！」此乃薄利多銷法，留番嚟在新春前推出，果然大收旺場之效，將唔少電器清倉。
建築邦點解要換電視呢？一來貪新款新產品，二來係呢部電視係MadeinJapan（日本製造）。建築邦話日本工業萎縮，大公司紛紛宣佈日本廠房停產，以後日本牌子盡量在中國及東南亞製造，質素方面，自然差少少，建築邦預言日本製造嘅電視機一如美國製造嘅波鞋，將會絕跡市場，買番架包冇蝕底。聽佢一言，先至明白點解有啲日本牌子最近刊登廣告，賣點盡在MadeinJapan。日本工業在一月三十日宣佈裁員二萬七千人，衰退似乎沒完沒了。美國唔掂，日本唔掂，經紀L叫左丁山唱好，自己實在有心無力。