民主黨主席仁哥噚日破天荒喺屋企同一眾記者行家慶祝新年，令大家得以一睹仁哥嘅家居生活。只見仁嫂打理得間屋井井有條，成個廳十分寬敞開揚，仲有大書架擺咗唔少仁哥嘅愛書，絕對係一個安樂窩。不過噚日最搶鏡嘅，要算係仁哥仁嫂養嘅一對小狗阿Sa同阿豬喇，當中阿豬仲要打埋煲呔亮相，變身「煲呔豬」，令到唔少行家一見佢就愛不惜手，呢隻八哥仔嘅受歡迎程度，肯定高過煲呔曾。
救唔番黑妹感可惜
仁哥話，兩隻狗仔養咗六、七年左右，阿Sa係狗女，煲呔豬係狗仔，兩隻佢都一樣咁鍾意，冇偏心。但據仁哥所講，煲呔豬食嘢時就唔係人咁品，邊個夠膽伸隻手埋去阻到佢，隨時連隻手都俾佢食埋喎。作為愛狗之人，仁哥都有留意早排「黑妹」嘅新聞，坦言對黑妹最終都救唔番感到好可惜，仲認為事件反映政府辦事效率唔多掂咁話。
曾被人扑頭襲擊而有「鐵頭仁」綽號嘅仁哥，噚日又學鬍鬚曾咁分享佢嘅習武經驗，話年輕時學過「永春拳」，仲好似葉問咁成日打木人樁，所以𠵱家身手都唔太差。