正所謂「好嘅唔靈醜嘅靈」，行會新貴鄉議局主席發叔年初二為香港求咗支下籤，大家啋啋聲之際，夜晚就即刻有艘煙花船意外着火。到噚日發叔主持鄉議局團拜時被問起呢件事，佢即時為自己大平反，話咁就證明佢求籤時冇花冇假冇造馬，否則支籤點會咁靈？
篤信風水命理嘅發叔話，大家如果真係信神靈嘅話，呢支籤真係畀咗個好好嘅啓示過大家，叫港人今年凡事小心，做定心理準備，所以抽到下籤未嘗唔係一件好事喎。聽佢咁講，似乎香港人要多謝番佢咁噃，事關佢寧願俾人鬧手臭都要揭露特區真相嘛。
發叔自稱唔識捉內鬼
籤文一句「家有內鬼」引起各界議論，競猜政府入面邊個係人邊個係鬼，發叔自稱對呢單嘢冇乜頭緒，事關自己唔係鍾馗，點識捉鬼？八方相信發叔亦唔係「鬼」，事關佢係鬼嘅話，噚日又點會咁多高官畀面佢，拉大隊嚟鄉議局嘅新春團拜？數數手指由署理特首唐唐打落，仲有七位局長及幾位副局長、政治助理，平日去立法會都冇咁齊人啦。
既然賓客咁畀面，發叔都要聊表心意，致辭時重申鄉議局一如既往求穩定、和諧，全力支持同配合政府施政，又話特區未來唔少發展項目都要新界人配合，行會有佢喺度相信協調會好好多，率先向政府表明心迹，唔會作反咁話。
民政事務局局長曾德成代表政府上台致辭時，亦大讚新界人向有鮮明愛國愛港嘅傳統，鄉議局除咗向政府提供寶貴意見，亦積極配合政府施政，總之發叔獲委任入行會就有利凝聚城鄉團結。佢咁講，唔通係話以前嘅城鄉關係唔夠好？
賭王預言重上二萬點
身為發叔老友嘅賭王都有嚟撐場，最鍾意玩預言嘅佢仲大膽預測，話今年係「好年」，各項發展特別好。賭王呢個分析來自佢個人認為牛好辛苦，香港人今年亦會好辛苦喎，所以真係啱晒，肯定好好，都幾無厘頭。咁究竟經濟點好法呀？賭王話未到年初十個市都一路會好，好到二萬幾點。問題係今日已經初八，賭王又冇講到兩日之後，即係初十之後個市會點，股民真係要自求多福喇。
mailto:[email protected]
