環球金融海嘯下，幾乎全部金融機構損手爛腳，仲有唔少高層喺公司被政府「國有化」或者接管時，直接或者間接離場，當中十之八九都係等運到，未有着落。凡事總有例外，蘇格蘭皇家銀行（RBS）董事兼環球市場主席JohnnyCameron就泊到好碼頭，好有可能成為海嘯下第一位轉工嘅高級管理層。
《英國電訊報》報道，今個月正式離開RBS嘅Cameron已經急不及待，同專做併購交易嘅獨立顧問公司Greenhill密斟，希望撈到高級顧問一職，唔單止咁，佢仲同其他顧問公司斟緊，完全唔憂冇工做。
不過，Cameron做唔做呢份工，其實都唔使驚，佢加入RBS十年都賺唔少。06年入董事局，同年由於企業貸款業務急速增長，帶挈佢一年勁賺350萬英鎊（3955萬港銀），07年都賺320萬英鎊（3616萬港銀）。
Cameron同RBS前行政總裁SirFredGoodwin係老死，自從去年10月英國政府注資200億英鎊救RBS後，Goodwin黯然下台，新任行政總裁StephenHester上場後，Cameron即刻辭職。