一場金融海嘯，各行各業都受牽連，高危行業之一嘅地產代理，裁員瘦身不特止，高層一族大執位，管理層似玩音樂椅咁團團轉。兩年多前至創立嘅盈富物業，老細張錦成回巢老家美聯集團後，盈富原本交畀拍檔兼董事黎偉強（Samuel）打骰，不過，呢場世紀巨浪冲力猛烈，中小型行嘅盈富頂唔住結業，Samuel旋即蟬過別枝。
同樣由美聯出身嘅Samuel，今次未有跟舊老闆一樣重回美聯，反而轉去中原集團旗下嘅利嘉閣，做中半山、南區兼山頂營業董事。
唔跟張錦成回巢
聽聞，佢噚日第一日返新工，對於過往做開新界區地頭嘅佢，都算係一個新挑戰。事實上，近排代理界高層變動此起彼落，上月中香港置業前行政總裁胡日發就突然辭職，由執董李志成頂上。代理界人士話，呢場海嘯一日未停，音樂椅睇怕都會繼續轉。