達沃斯世界經濟論壇發表驚世報告，話全球正面臨「水破產」嘅危機，喺唔夠20年內，水資源將會成為投資主題，仲會貴過石油咁話。份報告解釋，好多地方嘅水價太平搞到被長期浪費，另外有啲國家就將啲水拎咗去做農業灌溉同水庫儲水，搞到全球有七成嘅河流就快亁涸。
唔單止咁，水力發電亦會對農業用水構成重大威脅，好似美國同歐盟，三成用水量都係消耗喺能源生產，只有3%水真正得到利用。
報告越講越恐怖，話喜馬拉雅山同西藏嘅冰河若果以𠵱家嘅速度融化，去到2100年就會全部消失，到時有20億人會好大鑊。唔單止咁，水源短缺會令大量農田消失，面積會係美國同印度兩國農田嘅總和。相信香港人對於十幾廿年前要制水嘅日子都仲猶有餘悸，睇嚟大家真係要珍惜食水，唔係全世界好快就有「制水潮」。