花旗股市上禮拜五繼續下跌，道指收市雖然力保8000關，但係大勢仍偏軟，奧巴馬設立「壞銀行」嘅計劃可能告吹，如果官方唔出嚟澄清，銀行股會繼續受壓，道指有機會再創近期低位。
投資者對呢個傳聞嘅反應唔算過敏，單睇上個月花旗就有6家銀行倒閉，唔講得笑。睇番港股，呢兩日走勢唔錯，喺花旗股市下試低位之前，應該可以靠穩。
中行C輪15553：中行（3988）上周五收2.07元，升2.4巴仙，早排沽壓好大，近日喺2元水平整固，似部署反彈，睇成交差唔多開車，短線上試2.20元，破位睇2.35元，可以諗吓隻C輪15553，隻輪現價22.1仙，有效槓桿4.4倍，正股升上2.35元，15553可見37.3仙，正股跌穿1.97元就沽咗隻輪止蝕。
俊樺