認識彭浩翔及彭秀慧之先，都有一刻想過他們是兄妹，有時會一齊度橋至深宵，在《伊莎貝拉》中，劇后彭秀慧更成為了彭導的編劇。相反，彭浩翔亦會聲演彭秀慧的《29+1》，今日他們笑笑口澄清，「我哋雖然唔係兄妹，不過感情分分鐘仲好過親兄弟姊妹！」雖無血緣關係，但兩位同樣都是甚麼都要試的雙面人。
記者：蒙為亮
攝影：楊錦文
鳴謝：DAPJPWineHouse
彭秀慧
香港演藝學院戲劇學院表演系畢業，04年獲獎學金到巴黎研習，05年首度發表自編自導自演作品《29+1》，08年更憑《再見不再見》得到香港舞台劇獎最佳女主角。
彭浩翔
01年，27歲執導首部電影《買兇拍人》即獲香港金紫荊獎最佳編劇，03年第二部作品《大丈夫》更獲香港金像獎最佳新導演，作品《伊莎貝拉》更入選德國柏林電影節之競賽作品。
結緣於Nude
畢竟中國人是保守的，一講全裸，媽咪立刻唔畀講，唔畀睇，唔畀聽。外國當然開放得多，「Nude」一字不但有少少藝術氣質，大家還為藝術而犧牲的人可敬可畏。無獨有偶，全裸也竟然是彭浩翔及彭秀慧相識的開端，認真少少「鹹」，多多趣！
翔=彭浩翔
慧=彭秀慧
慧：又要講我哋相識經過呀？唔好啩……
翔：哈哈……每次講番起都真係笑到停唔到口，其實我當年拍完《買兇拍人》之後已經立刻想開《破事兒》，我記得好似係97年咁上下。《破事兒》第一part，田蕊妮同陳輝虹咪有場床上戲嘅，想搵人Nude但唔用脫星，10年前真係難過登天，喺唔想搵三級女星嘅情況下，有朋友話有個靚女會喺舞台劇作全裸演出，我諗住即刻拍板，點知見到真人之後真係……（嘆氣）……哈哈……
慧：𠵱家好失禮你呀！
翔：講笑啫……
慧：我要澄清一樣嘢，當時我係做緊中英劇團嘅《中環廣場上的野餐》，只係喺最後一幕Blackout時我除晒所有衫，當時個台真係黑到乜都睇唔到，而且都有做好少好少嘅防護措施。但我真係估唔到彭秀慧會因為Nude而得到戲行內好多朋友討論，搞到之後接住嗰兩年做嘅都係情婦同妓女等等，都真係幾弊！
翔：你咁嘅質素都做到情婦、妓女？可見APA嘅學生應該係同社會脫咗節，你哋應該去砵蘭街進修一下先，哈哈……
慧：（不停打彭浩翔）……呢一段唔好寫……
作弄王VS認真花旦
全個訪問過程都在嬉笑中度過，一有位「入」，彭浩翔必定不會放過彭秀慧，可憐的秀慧全程只能在挨打的狀態，不過彭浩翔就反稱這種詆毀非作弄，只是想試試她的容忍底線，氣得身旁的彭秀慧唔知好嬲定好笑。
翔：彭秀慧，其實我咁樣做都係為你好，我只係想試練你咋。
慧：唔緊要，其實我𠵱家對住你，都已經進入化境，你講乜我都會好平靜。
翔：哈哈，不過講開你性格，其實都真係好認真，而且開會都甚少遲到，的確幾好。
慧：不過有一次彭浩翔話成個星期都要六點鐘起身開會，我就遲到咗，唔係因為起唔到身，而係無隧巴！
翔：哈哈，我都記得。
慧：我發覺有時真係好似前世欠咗你咁，成日都詆毀我，好彩你都未試過鬧我，如果唔係真係喊畀你睇，而且佢呢啲處女座真係好難服侍。
翔：處女座都幾好，做嘢認真嘅完美主義者嘛！
慧：所以其實我係好包容同遷就你㗎，不過你真係有少少叻，而且出尾期都算幾準，哈哈。
翔：你都認真，而且個樣仲有啲似我阿媽，所以先會俾人誤傳我哋係兄妹呢個笑話。
慧：好喇喎，彭浩翔……
翔：哈哈，真係喎，仲記得嗰時拍緊《伊莎貝拉》，啲工作人員全部都以為你係我阿妹。
慧：所以起初佢哋好似對我特別好咁，不過一知道我唔係就好似對我無咁好！
翔：心理作用啫，你知唔知點解佢哋咁耐都唔夠膽問吖？你知啦，𠵱家啲家庭好複雜㗎，有好多時明明係有血緣關係嘅兄妹，可以十幾年都唔知㗎。
慧：但係嗰個一定唔會係我哋兩個囉，唔該！
09年拍住上
常常都覺得彭氏兄妹是喜愛發展的雙面人，男的在導演工作中有所成功，但越拍得高檔次就越返璞歸真，閒時總愛發手痕寫散文小說，幾乎幾個月出一本書。女的貴為舞台劇劇后，本可藉意踩過界做電視又拍戲，但她又獨愛劇本，度度新橋。他們卻一起大笑聲言：「別人笑我太瘋癲，我笑他們看不穿！」
慧：你套十一歲短片幾時上？又話搵我做MC？
翔：嗰套係我十一歲用一部VHS攝錄機拍嘅《智勇三熊》。
慧：其實你咁忙邊有時間寫書呀？
翔：有，而且小說散文我一定會keep住寫，之前都有喺《蘋果》寫些散文，所以出咗一本《壹種風流》，當時都係副刊總編叫我寫的，差不多寫咗成年，𠵱家就喺《cup》寫專欄，我覺得寫字先可以真正表達到自己！
慧：嘩，突然間講到咁深，拍電影表達唔到咩？
翔：唔得，因為幾乎拍一套就遺憾一套，基本上我拍完啲戲自己都好少睇番，因為拍戲有好多嘢都控制唔到，budget、人手、投資者等等，寫嘢就可以隨心所欲得毫無計算。
慧：都啱，情況都有啲似我，做劇同寫劇本我都鍾意，其實都係創作，只不過形式唔同，所以界限同收穫都會有所不同。
翔：其實你有無諗過學其他人咁試吓其他媒體嘅演出？
慧：邊啲係其他人先？哈哈……
翔：你知嘅……哈哈……
慧：無話一定要，但係有都唔會抗拒，不過當然都會以做舞台為依歸，我哋呢啲做慣劇台，一做電影就會好容易做得神情太誇張，所以六月我都係re-run番《再見不再見》！
翔：嘩！你兜咁大個圈sell嘢！
慧：講開之嘛！今次會喺演藝做，所以舞台設計上會有好多花款，而且場地又大咗咁多，所以真係好大壓力。
翔：會唔會再Nude先？Nude可能啲飛會買得好啲？
慧：死啦！（再打彭浩翔）
翔：講吓笑啫……
後記：
看過彭浩翔在《壹種風流》入面的一個短章節，內容大概講述彭導對文字的認真，說的不是修辭技巧及押韻鏗鏘等，而是文字的格式，如所有文章不可不中不英，如我好Proudof，明明有驕傲，不用驕傲，頓時驕傲就變得失禮。還有，開新段應隔兩個格，是按四下Spacebar，省略號是六點等，這些認真的執着跟排戲排到幾日唔瞓、飯都唔食的不眠花旦彭秀慧不謀而合，兩個人夾得來，Friend到好似兄妹咁，一定有原因。
《智勇三熊》
《智勇三熊：彭浩翔的第一次》綜合了一些兒時瘋狂錄像拍攝的首部短片《暑期作業》，08年4月於意大利烏甸尼斯電影節首演，隨後10月在香港亞洲電影節公映，由於反應熱烈，今年再於香港藝術中心公映兩場。
日期：2月7日（星期六）
時間：7:30pm、9:15pm
地點：香港藝術中心AGNESB.電影院
門票：$80
查詢：27349009（城市電腦售票處）
《再見不再見》
劇后彭秀慧勇奪劇后的得獎作，4月將第三度公演。
日期：4月23日-26日
時間：8:00pm
地點：香港演藝學院歌劇院
門票：$270$300
查詢：94467094朱小姐